स्याङ्जा । भेटेरिनरी अस्पताल तथा पशु सेवा कार्यालय स्याङ्जाले किसानलाई दूधमा प्रतिलिटर ५ रुपैयाँका दरले अनुदान उपलब्ध गराएको छ।

कार्यालयका अनुसार भीरकोट नगरपालिका–१ स्थित भीरकोट दुग्ध उत्पादक सहकारीमार्फत बिक्री भएको १ लाख २६ हजार २९ लिटर दूधमा ६ लाख ३० हजार १४५ रुपैयाँ अनुदान दिइएको छ। त्यस्तै, चापाकोट नगरपालिका–५ क्वामीस्थित रत्नपुर साना किसान सहकारीलाई ७० हजार ८१७ लिटर दूधका लागि ३ लाख ५४ हजार ८५ रुपैयाँ अनुदान उपलब्ध गराइएको हो।

कार्यालय प्रमुख डा. रुपेश श्रेष्ठका अनुसार कार्यालयले सार्वजनिक गरेको सूचनाका आधारमा छनोट भएका सहकारीमा आबद्ध किसानले गाई तथा भैँसीपालनबाट उत्पादन गरेको दूध सहकारीको संकलन केन्द्रमार्फत बिक्री गरेबापत अनुदान पाएका हुन्।

विभिन्न कार्यक्रममार्फत अनुदान

भेटेरिनरी अस्पताल तथा पशु सेवा कार्यालयले दूधबाहेक विभिन्न कार्यक्रमअन्तर्गत गरी कुल १ करोड २८ लाख ६७ हजार २०० रुपैयाँ अनुदान वितरण गरेको जनाएको छ।

बृहत्तर पशु विकास प्रवर्द्धन कार्यक्रमअन्तर्गत नयाँ गोठ, तारबार, टाट्नो, बोका तथा यान्त्रिकीकरणका लागि कालीगण्डकी–१ र २ स्थित कालीगण्डकी कृषि उद्यमी महिला सहकारी संस्थालाई ८ लाख ४६ हजार ७३९ रुपैयाँ अनुदान दिइएको छ।

त्यस्तै, भीरकोट–२ स्थित बलाम डाँडा शान्ति कृषि तथा पशुपन्छीपालन कृषक समूहलाई ८ लाख ११ हजार ३४ रुपैयाँ, भीरकोट–३ स्थित बानेथोक देउराली बाख्रापालन समूहलाई ८ लाख ८८ हजार ९२४ रुपैयाँ तथा फेदीखोला–४ स्थित छेलो हाल्ने महिला कृषक समूहलाई ८ लाख ४२ हजार २३१ रुपैयाँ अनुदान दिइएको कार्यालयले जनाएको छ।

पशुपन्छी तथा मत्स्य उत्पादनमा पनि सहयोग

कालीगण्डकी करिडोर केन्द्रित पशुपन्छी तथा मत्स्य उत्पादन तथा प्रवर्द्धन कार्यक्रमअन्तर्गत गोठ तथा भकारो सुधारका लागि पकवादी कृषि सहकारी संस्थालाई १७ लाख ४० हजार ७३० रुपैयाँ र आमा बहुउद्देश्यीय सहकारी संस्थालाई १७ लाख ६२ हजार ४४१ रुपैयाँ अनुदान दिइएको छ।

यस्तै, व्यावसायिक ब्लक विकास कार्यक्रमअन्तर्गत हरिनास गाउँपालिकाका वडा नम्बर ४, ५, ६ र ७ मा सूर्यमुखी बाख्रापालन तथा कृषि समूहलाई २७ लाख ८७ हजार ३०२ रुपैयाँ अनुदान उपलब्ध गराइएको छ।

उत्पादनसँग जोड्नुपर्नेमा जोड

कार्यालयले किसानलाई अनुदान उपलब्ध गराए पनि उत्पादन र वास्तविक आवश्यकताका आधारमा अनुदान वितरण, कृषि ऋणमा सहज तथा सहुलियत र उत्पादनको बजार सुनिश्चितता आवश्यक देखिएको जनाएको छ।

किसानलाई अनुदानसँगै उत्पादनको उचित मूल्य र बजारको सुनिश्चितता गर्न सके कृषि तथा पशुपालन क्षेत्रलाई थप व्यावसायिक बनाउन सहयोग पुग्ने देखिन्छ।

Originally published on abcnews.com.np.