काठमाडौँ । काठमाडौँ उपत्यकामा खाना पकाउने एलपी ग्यासको अभाव कायमै रहँदा उपभोक्ताको सास्ती घटेको छैन । सरकारले विभिन्न स्थान तोकेर ग्यास बिक्री वितरण सुरु गरे पनि उपभोक्ताहरू बिहानैदेखि सिलिण्डर बोकेर लामो लाइनमा बस्न बाध्य भएका छन् ।

आज ठिमीस्थित राष्ट्रिय क्षयरोग केन्द्रमा ग्यास वितरण हुने सूचना पाएपछि बिहानैदेखि ठूलो संख्यामा उपभोक्ता सिलिण्डर बोकेर पुगेका छन् । त्यहाँ नेपाल, एचपी, सूर्य, सागर, एभरेष्ट र सुगमलगायत ब्रान्डका ग्यास बिक्री गर्ने भनिएको छ ।

ग्यास पाउने आशमा उपभोक्ताहरू घण्टौँ लाइनमा बसिरहेका छन् । तर, मागअनुसार पर्याप्त सिलिण्डर उपलब्ध नहुँदा कतिपय उपभोक्ता लामो समय कुरेर पनि ग्यास नपाई फर्किनुपर्ने अवस्था देखिएको छ ।

नेपाल आयल निगमले ग्यास अभाव सहज बनाउन काठमाडौँ उपत्यकाका विभिन्न स्थानबाट बिक्री वितरणको व्यवस्था गरेको छ । आइतबार राष्ट्रिय क्षयरोग केन्द्र, ठिमीसहित सात स्थानबाट ग्यास बिक्री गर्ने व्यवस्था गरिएको निगमले जनाएको छ ।

सरकारले ग्यासको आपूर्ति नियमित रहेको दाबी गर्दै अत्यावश्यक परेका उपभोक्तालाई मात्र तोकिएका बिक्री केन्द्रबाट ग्यास लिन आग्रह गरेको छ । तर, वितरण केन्द्रमा देखिएको भीड र लामो लाइनले उपभोक्ताको समस्या अझै समाधान भइनसकेको देखाएको छ ।

Originally published on abcnews.com.np.