काठमाडौं । लियोनल मेसीको कप्तानीमा रहेको इन्टर मियामी अमेरिकन मेजर लिग सकर (एमएलएस)मा ४–१ ले पराजित भएको छ ।

शनिबार अमेरिकाको नेस्भिलस्थित जियोडिज पार्कमा भएको खेलमा घरेलु टोली नेस्भिल एससीले मियामीलाई पराजित गरेको हो । यससँगै अगस्ट ८ मा आफ्ना बुवाको निधनपछि मेसीले खेलेका दुवै खेलमा इन्टर मियामी पराजित भएको छ । यसअघि मियामी क्लब लियोनसँग ३–२ ले पराजित भएको थियो ।

खेलमा मेसीले पेनाल्टीसमेत गुमाए । २३औँ मिनेटमा लुइस स्वारेजलाई पेनाल्टी क्षेत्रमा लडाएपछि मियामीले पेनाल्टी पाएको थियो । मेसीले प्रहार गरेको बल नेस्भिलका गोलकिपर ब्रायन स्च्वाकले बचाए ।

पहिलो हाफको इन्ज्युरी समयमा मियामीका टेलास्को सेगोभियाले गोल गर्दै खेल बराबरीमा ल्याएका थिए । तर दोस्रो हाफमा नेस्भिलले थप तीन गोल गर्दै ४–१ को सहज जित निकालेको हो ।

मेसीका लागि पछिल्लो समय पेनाल्टीमा खराब लय देखिएको छ । गत महिना सम्पन्न फिफा विश्वकपमा समेत उनले दुई पेनाल्टी अवसर गुमाएका थिए ।

Originally published on abcnews.com.np.