जेनजी आन्दोलनपछि तत्कालीन सभापति देउवाले राजनीतिबाट विश्राम लिने घोषणा गर्दै खड्कालाई कार्यवाहक सभापतिको जिम्मेवारी दिएका थिए । त्यसपछि महामन्त्रीद्वय गगन थापा र विश्वप्रकाश शर्माको पहलमा विशेष महाधिवेशन आयोजना भई नयाँ नेतृत्व चयन भएको थियो । त्यससँगै कांग्रेसभित्र नेतृत्वको विवाद चर्किएको थियो ।

निर्वाचन आयोग र अदालतको प्रक्रियाबाट गगन थापा नेतृत्वको कांग्रेसले वैधानिकता पाएपछि इतर पक्षका अधिकांश नेता सोही समूहबाट निर्वाचनमा सहभागी भए । तर खड्काले टिकट पाएनन् । इतर पक्षबाट निर्वाचन लडेका अधिकांश उम्मेदवार पराजित भएपछि पार्टीभित्र समानान्तर गतिविधि सुरु भएको थियो ।

स्रोतका अनुसार खड्का भने यस्तो समानान्तर गतिविधिको पक्षमा छैनन् । राष्ट्रिय भेला आयोजना गर्ने विषयमा समेत उनी सहमत थिएनन् । यही कारण भेलाको समापनमा उनको अनुपस्थिति अर्थपूर्ण रूपमा हेरिएको छ ।

शशांकलाई जिम्मेवारी

खड्का भेलामा सहभागी नभएपछि पूर्वमहामन्त्री डा. शशांक कोइराला इतर समूहमा सक्रिय देखिएका छन् । भेलाको समापनमा सहभागी नेताहरूले उनलाई १५औँ महाधिवेशनको तयारी अघि बढाउने जिम्मेवारीसमेत दिएका छन् ।

भेलाले देउवा नेतृत्वकै कार्यसमितिलाई आधार मानेर आगामी नियमित महाधिवेशनको तयारी अघि बढाउने निर्णय गरेको बताइएको छ । महाधिवेशनसम्बन्धी आवश्यक कामको संयोजन गर्ने जिम्मेवारी शशांक कोइरालालाई दिइएको छ ।

पार्टी विभाजनको पक्षमा छैनन् खड्का

स्रोतका अनुसार खड्का कांग्रेस विभाजनको पक्षमा छैनन् । पार्टीको आधिकारिकतासम्बन्धी विवादमा अदालतले पुनरावलोकनको आदेश दिइसकेकाले अब अदालतको अन्तिम फैसला पर्खिनुपर्ने उनको धारणा छ ।

भेलाको पहिलो दिन भने खड्का सहभागी भएका थिए र देउवाकै नेतृत्वमा कांग्रेसलाई एकताबद्ध गर्नुपर्ने धारणा राखेका थिए । स्रोतका अनुसार उनी पहिलो दिन पनि भेलामा सहभागी हुने–नहुने विषयमा अन्योलमा थिए । देउवा स्वदेश फर्किएपछि उनी भेलामा सहभागी भएका थिए ।

तर समापन समारोहमा भने खड्का अनुपस्थित रहे । पछिल्लो अवस्थाले उनी इतर समूहले सञ्चालन गर्ने समानान्तर गतिविधिमा सक्रिय रूपमा सहभागी नहुने संकेत गरेको स्रोतको दाबी छ।