लुम्बिनी, २ बैशाख । लुम्विनी बौद्ध बिश्वविद्यालयले बुद्ध जयन्तीका अवसरमा बैशाख १६ गते लुम्विनीमा पहिलो पटक दीक्षान्त समारोह आयोजना गर्ने भएको छ ।

विश्वबिद्यालयले आइतबार लुम्विनीमा पत्रकार सम्मेलन गरी स्नातकोत्तर र विद्यावारिधि उत्तीर्ण विद्यार्थीहरुलाई पहिलो पटक दीक्षित गर्न लागेको जानकारी गराएको हो । विश्वविद्यालयका रजिष्टार तिलक आचार्यले स्नातकोत्तर उत्तीर्ण ९१ जना र विद्यावारिधी उत्तीर्ण १६ जनालाई दीक्षित गरिने जानकारी दिनुभयो ।

दीक्षान्त समारोहमा श्रीलंकाको बुद्धिष्ट एण्ड पालि युनिभर्सिटि अफ श्रीलंकाका उपकुलपति भिक्षु प्रा.डा. गल्ल्याले सुमन सिरी थेरोलाई प्रमुख अतिथिका रुपमा आमन्त्रण गरिएको छ । कार्यक्रममा विश्वबिद्यालयका कुलपति प्रधानमन्त्री केपी शर्मा ओली पनि उपस्थिति रहने रष्टिार आचार्यले जानकारी दिनुभयो ।

२०६३ सालमा स्थापना भएको लुम्विनी बौद्ध विश्वविद्यालयमा २०६९ सालदेखि पठनपाठन सुरु भएको हो । विश्वविद्यालयमा स्नातकदेखि बिद्यावारिधिसम्म ४४७ विद्यार्थी अध्ययनरत छन् ।