काठमाडौं । स्पेनिस क्लब बार्सिलोना इंग्लिस क्लब म्यानचेस्टर सिटीका स्टार मिडफिल्डर रोड्रीलाई भित्र्याउन सहमत भएको छ। बार्सिलोनाले रोड्रीका लागि सिटीलाई ६५ मिलियन पाउन्ड तिर्ने सहमति भएको बताइएको छ।

रोड्री र बार्सिलोनाबीच चार वर्षको सम्झौतासमेत भएको जनाइएको छ। क्लबले केही दिनभित्रै उनको अनुबन्धबारे औपचारिक घोषणा गर्ने तयारी गरेको छ।

रोड्रीलाई यसअघि स्पेनकै अर्को शीर्ष क्लब रियल मड्रिडले भित्र्याउने चर्चा चलेको थियो। तर बार्सिलोनाले उनलाई आफ्नो प्राथमिकतामा राख्दै सम्झौता गर्न सफल भएको हो।

यसअघि बार्सिलोनाले रोड्रीका लागि सिटीसमक्ष ३८.५ मिलियन पाउन्डको प्रस्ताव गरेको थियो। तर सिटीले उक्त प्रस्ताव अस्वीकार गरेको थियो। त्यसपछि बार्सिलोनाले प्रस्ताव बढाउँदै ६५ मिलियन पाउन्डमा सम्झौता गरेको बताइएको छ।

विश्वकपमा उत्कृष्ट खेलाडी

रोड्री पछिल्लो समय विश्व फुटबलका उत्कृष्ट मिडफिल्डरमध्ये एकका रूपमा स्थापित छन्। गत महिना सम्पन्न फिफा विश्वकपमा उनी सर्वोत्कृष्ट खेलाडीघोषित भएका थिए।

उनले सन् २०२४ मा प्रतिष्ठित बालोन डी’ओर समेत जितेका थिए।

रोड्रीले स्पेनिस क्लब एट्लेटिको मड्रिड छाडेर सन् २०१९ मा म्यानचेस्टर सिटीमा आबद्ध भएका थिए। त्यसयता उनले सिटीलाई घरेलु तथा अन्तर्राष्ट्रिय प्रतियोगितामा महत्वपूर्ण सफलता दिलाएका छन्।

सिटीमा १२ उपाधि

रोड्री म्यानचेस्टर सिटीमा आबद्ध भएपछि क्लबले विभिन्न प्रतियोगितामा गरी १२ उपाधि जितेको छ।

उनको आगमनपछि सिटीले चार पटक प्रिमियर लिग, तीन पटक ईएफएल कप, दुई पटक एफए कप र एक पटक यूईएफए च्याम्पियन्स लिगजितेको उल्लेख गरिएको छ।

बार्सिलोनाले रोड्रीलाई भित्र्याएसँगै टोलीको मिडफिल्ड थप बलियो हुने अपेक्षा गरिएको छ। उनको खेल्ने शैली, पासिङ क्षमता र मिडफिल्ड नियन्त्रण गर्ने क्षमताका कारण उनी बार्सिलोनाको आगामी योजनाका लागि महत्वपूर्ण खेलाडी बन्ने अपेक्षा गरिएको छ।

रोड्रीको औपचारिक अनुबन्ध घोषणा भएपछि बार्सिलोनामा उनको आगमनलाई क्लबको पछिल्लो समयकै महत्वपूर्ण ट्रान्सफरमध्ये एकका रूपमा हेरिनेछ।

Originally published on abcnews.com.np.