काठमाडौं । उज्यालो नेपाल पार्टीले विद्युत्मा लगाइएको मूल्य अभिवृद्धि कर (भ्याट) खारेज गर्न माग गर्दै सोमबार काठमाडौंको माइतीघर मण्डलमा प्रदर्शन गरेको छ।

कुलमान घिसिङ नेतृत्वको पार्टीले बिजुलीमा लगाइएको भ्याट हटाउन सरकारलाई दबाब दिने उद्देश्यले हस्ताक्षर संकलन अभियानसमेत सुरु गरेको छ।

प्रदर्शनका क्रममा पार्टीका नेता तथा कार्यकर्ताले विद्युत् उपभोगमा लाग्ने कर हटाउनुपर्ने माग राखेका थिए। विद्युत् आम नागरिक तथा उद्योग–व्यवसायका लागि अत्यावश्यक सेवा भएकाले यसमा थप करको भार लगाउन नहुने पार्टीको तर्क छ।

उज्यालो नेपालले बिजुलीको भ्याट खारेजीसँगै डेडिकेटेड तथा ट्रंक लाइनको बक्यौता विद्युत् महसुल असुल गर्न पनि सरकारको ध्यानाकर्षण गराएको छ।

पार्टी अध्यक्ष कुलमान घिसिङले हस्ताक्षर अभियानमार्फत सरकारमाथि दबाब सिर्जना गर्ने बताए।

उनका अनुसार विद्युत् क्षेत्रसँग सम्बन्धित नीतिगत विषयमा सरकारलाई जिम्मेवार बनाउन जनस्तरबाट दबाब आवश्यक रहेको छ।

सीके राउतले दिए समर्थन

उज्यालो नेपालले आयोजना गरेको हस्ताक्षर कार्यक्रममा जनमत पार्टीका अध्यक्ष सीके राउतसमेत सहभागी भएका थिए।

राउत सोमबार माइतीघर मण्डल पुगेर प्रदर्शनमा सहभागी भएका तथा अभियानप्रति समर्थन जनाएका थिए।

उज्यालो नेपालले विद्युत्मा लगाइएको भ्याट हटाउनुपर्ने माग यसअघि पनि उठाउँदै आएको थियो। पार्टीले विद्युत् कर हटाउन सरकारको ध्यानाकर्षण गराउन विभिन्न कार्यक्रम गर्दै आएको जनाएको छ।

पार्टीले विद्युत् क्षेत्रलाई उत्पादन, रोजगारी र औद्योगिक विकासको आधारका रूपमा अघि बढाउन उपभोक्तामाथिको कर भार घटाउनुपर्ने धारणा राख्दै आएको छ।

हस्ताक्षर अभियानमार्फत संकलित हस्ताक्षर सरकारलाई बुझाएर विद्युत्मा लगाइएको भ्याट खारेजीका लागि थप दबाब सिर्जना गर्ने उज्यालो नेपालको तयारी छ।

Originally published on abcnews.com.np.