काठमाडौं । संघीय सरकारअन्तर्गत कार्यरत राष्ट्रसेवक कर्मचारीले अबदेखि महिनामा दुई पटक अर्थात् प्रत्येक १५ दिनमा तलब तथा भत्ता पाउने व्यवस्था कार्यान्वयन हुने भएको छ। महालेखा नियन्त्रक कार्यालयले यससम्बन्धी व्यवस्था कार्यान्वयन गर्न देशभरका कोष तथा लेखा नियन्त्रक कार्यालयलाई परिपत्र गरेको छ।

महालेखा नियन्त्रक कार्यालयले आइतबार जारी गरेको परिपत्रमा कर्मचारीको तलब तथा भत्ता अर्धमासिक रूपमा भुक्तानी गर्न निर्देशन दिइएको छ। अर्थ मन्त्रालयको नीतिगत मार्गदर्शन तथा चालु आर्थिक वर्षको बजेट वक्तव्यमा गरिएको व्यवस्थाअनुसार नयाँ प्रणाली कार्यान्वयन गर्न लागिएको कार्यालयले जनाएको छ। यसका लागि आवश्यक प्रणाली सुधारसमेत गरिसकिएको बताइएको छ।

नयाँ व्यवस्थाअनुसार कर्मचारीले हाल खाइपाइ आएको मासिक तलब–भत्तासँगै थप गरिएको कर्मचारी प्रोत्साहन भत्तासमेत अर्धमासिक रूपमा प्राप्त गर्नेछन्। प्रत्येक महिनाको १५ दिन पूरा भएपछि सो अवधिको पारिश्रमिक भुक्तानी गर्ने व्यवस्था मिलाउन कोष तथा लेखा नियन्त्रक कार्यालयहरूलाई निर्देशन दिइएको छ।

यसअघि अर्थमन्त्री डा. स्वर्णिम वाग्लेले गत वैशाख ४ गते नीतिगत मार्गदर्शनअनुसार प्रत्येक १५ दिनमा कर्मचारीको तलब भुक्तानी गर्ने व्यवस्था कार्यान्वयन गर्न महालेखा नियन्त्रक कार्यालयलाई निर्देशन दिएका थिए। तर, आवश्यक तयारीका कारण उक्त व्यवस्था तत्काल कार्यान्वयनमा आउन सकेको थिएन।

प्रदेश र स्थानीय तहमा पनि लागू हुन सक्ने

महालेखा नियन्त्रक कार्यालयका अनुसार हालको व्यवस्था संघीय सरकारअन्तर्गतका कर्मचारीमा मात्र लागू हुनेछ। प्रदेश तथा स्थानीय तहले आवश्यक निर्णय गरेमा आफ्ना कर्मचारीको हकमा पनि अर्धमासिक तलब भुक्तानीको व्यवस्था लागू गर्न सक्नेछन्।

नयाँ प्रणाली कार्यान्वयनमा आए कर्मचारीले महिनाको अन्त्यसम्म कुर्नुपर्ने अवस्था हट्ने र प्रत्येक १५ दिनमा आफ्नो पारिश्रमिक प्राप्त गर्ने व्यवस्था हुनेछ।

Originally published on abcnews.com.np.