काठमाडौं । राष्ट्रिय स्वतन्त्र पार्टी (रास्वपा) का सांसद मोहनलाल आचार्यले विद्युतमा लगाइएको कर पुनर्विचार गर्न सरकारसँग आग्रह गरेका छन्। प्रतिनिधिसभाको बैठकमा बोल्दै उनले वैकल्पिक ऊर्जाका स्रोतलाई समेत प्रवर्द्धन गर्नुपर्नेमा जोड दिए।

सांसद आचार्यले देशका विभिन्न जिल्लामा अझै पनि खाना पकाउने ग्यासको अभाव रहेको भन्दै तत्काल सहज आपूर्तिको व्यवस्था गर्न सरकारको ध्यानाकर्षण गराए।

उनले भने, ‘मेरो जिल्ला लगायतका थुप्रै जिल्लाहरूमा ग्यासको अभाव अहिले पनि देखिएको छ। त्यसले गर्दा तत्काल ग्यास आपूर्ति गर्न र सम्बन्धित निकायलाई जवाफदेही र जिम्मेवार बनाउन सम्बन्धित मन्त्रालयको ध्यानाकर्षण गराउन चाहन्छु।’

मन्त्रीले संसद्मा ग्यासको अभाव नरहेको दाबी गरे पनि बजारमा भने ग्यास नपाइएको भन्दै आचार्यले सरकारसँग प्रश्न गरे। उनले ग्यास कहाँ र कसरी रोकिएको वा लुकाइएको छ भन्ने विषयमा तत्काल खोजतलास गरी सहज आपूर्ति सुनिश्चित गर्न माग गरे।

‘मन्त्रीले सदनमा ग्यासको अभाव छैन भनिरहनुभएको छ, तर बजारमा किन पाइँदैन ?’ भन्दै उनले सम्बन्धित निकायलाई ग्यास आपूर्ति व्यवस्थाबारे स्पष्ट पार्न आग्रह गरे।

सांसद आचार्यले विद्युतको प्रयोग बढाउँदै वैकल्पिक ऊर्जालाई प्रोत्साहन गर्न सके ग्यासमाथिको निर्भरता घटाउन सकिने भन्दै विद्युतमा लगाइएको करसम्बन्धी व्यवस्थामा पुनर्विचार गर्नुपर्ने धारणा राखे।

Originally published on abcnews.com.np.