काठमाडौं । युवा, श्रम तथा रोजगार मन्त्री रामजी यादवले वैदेशिक रोजगारीमा हुने ठगी तथा शोषण नियन्त्रणका विषयमा राष्ट्रियसभामा प्रश्न उठेपछि आक्रोश व्यक्त गरेका छन्।

सोमबार राष्ट्रियसभा बैठकमा कांग्रेस सांसद विष्णुकुमारी सापकोटाले वैदेशिक रोजगारीलाई सुरक्षित र मर्यादित बनाउन सरकारले गरिरहेका कामबारे प्रश्न गरेकी थिइन्। जवाफमा मन्त्री यादवले यो समस्या लामो समयदेखि रहँदै आए पनि विगत ३५ वर्षसम्म ठोस कदम नचालिएको भन्दै प्रश्न उठाए।

मन्त्री यादवले सांसद सापकोटाले उठाएको विषय गम्भीर रहेको भन्दै सरकार उनको चिन्तासँग सहमत रहेको बताए। तर, अहिले आएर मात्रै यस विषयमा गम्भीर प्रश्न उठाउनुको कारणबारे उनले प्रतिप्रश्न गरे।

“गम्भीर प्रश्नका लागि धन्यवाद। यो विषय साँच्चिकै गम्भीर छ, त्यसैले माननीयजीले राखेको चिन्तासँग सरकार सहमत छ,” मन्त्री यादवले भने, “तर, यो विषयलाई म कसरी सोचिरहेको हुन्छु भने किन यस्ता चिन्ता ३५ वर्षसम्म आएन ? यदि चिन्ता गरिएकै हो भने किन ठोस कदमहरू चालिएनन् ?”

‘३५ वर्षसम्म यो कुरा किन बल्झियो?’

मन्त्री यादवले वैदेशिक रोजगारीसँग जोडिएका समस्या लामो समयदेखि रहँदै आएको उल्लेख गर्दै विगतमा पर्याप्त काम हुन नसकेको बताए।

उनले सांसद सापकोटालाई प्रश्न गर्दै भने, “अब अचानक यो विषयमा गम्भीर भएर आउनुहुन्छ । ३५ वर्षसम्म यो कुरा किन बल्झियो ? पहिला केही काम भएन होइन र ?”

वैदेशिक रोजगारीमा हुने ठगी, शोषण तथा श्रमिकका समस्याबारे सरकार गम्भीर रहेको बताउँदै मन्त्री यादवले विगतको अवस्थाको समेत समीक्षा आवश्यक रहेको संकेत गरेका छन्।

Originally published on abcnews.com.np.