काठमाडौँ । निर्वाचन आयोगले मृत्यु भएका मतदाताको विवरण अद्यावधिक गराई मतदाता नामावलीलाई शुद्ध, अद्यावधिक र विश्वसनीय बनाउन आग्रह गरेको छ।

आयोगले बिहीबार विज्ञप्ति जारी गर्दै कुनै मतदाताको मृत्यु भएको अवस्थामा निजका एकाघर परिवारका सदस्य वा अन्य व्यक्तिले मृत्युदर्ता प्रमाणपत्रसहित सम्बन्धित निर्वाचन कार्यालयमा यथाशीघ्र जानकारी गराउन अनुरोध गरेको हो।

आयोगका अनुसार मतदाता नामावली निरन्तर अद्यावधिक गर्नु निर्वाचनको स्वच्छता, निष्पक्षता र विश्वसनीयतासँग प्रत्यक्ष रूपमा सम्बन्धित विषय हो। त्यसैले मृत्यु भएका मतदाताको विवरण सम्बन्धित निर्वाचन कार्यालयमा जानकारी गराई नामावली अद्यावधिक गर्न आयोगले सबै नागरिकलाई आग्रह गरेको छ।

आयोगका सहसचिव एवं प्रवक्ता नारायणप्रसाद भट्टराईद्वारा जारी विज्ञप्तिमा मतदाता नामावलीलाई वस्तुगत र विश्वसनीय बनाउन नागरिकको सहयोग आवश्यक रहेको उल्लेख गरिएको छ।

आयोगले मृत्यु भएका मतदाताको विवरण समयमै अद्यावधिक गर्न सहयोग गरी आगामी निर्वाचनको प्रक्रिया थप स्वच्छ र विश्वसनीय बनाउन सबैमा आग्रह गरेको छ।

Originally published on abcnews.com.np.