हेटौंडा । मकवानपुरको हेटौंडा उपमहानगरपालिका–१९ बस्तिपुरस्थित भित्री बासुदेव खोलामा आएको बाढीले चार बालिकालाई बगाएको छ। घटनामा एक बालिकाको मृत्यु भएको छ भने दुई जना अझै बेपत्ता छन्। एक बालिका भने पौडिएर ज्यान जोगाउन सफल भएकी छन्।

मंगलबार दिउँसो निर्मल माध्यमिक विद्यालय, बस्तिपुरबाट छुटेर घर फर्कने क्रममा चार बालिका खोलामा आएको बाढीमा परेका थिए। विद्यालयबाट करिब ४ बजे छुटेका उनीहरू साँझ करिब ४ः४५ बजे खोला तर्ने क्रममा भेलमा परेका हुन्।

हेटौंडा–१९ डाँडागाउँकी १३ वर्षीया सीमा भोलन भने भेलले बगाए पनि पौडिएर बाहिर निस्कन सफल भएकी छन्। उनलाई उपचारका लागि हेटौंडा अस्पतालमा राखिएको छ।

सीमाका अनुसार चारै जना बालिका हात समातेर खोला तर्दै गर्दा अचानक आएको भेलले सुरुमा ८ वर्षीया रोशनी स्याङ्ताङलाई बगाएको थियो। त्यसपछि ११ वर्षीया सुमित्रा भोलन र सीमा आफैंलाई पनि भेलले बगाएको उनले बताइन्।

‘हामी चारजना सँगै हात समातेर खोला तर्दै थियौँ। सुरुमा सानु बहिनीलाई बगायो। त्यसपछि सुमित्रा बहिनीलाई बगायो। त्यसपछि मलाई पनि बगायो,’ सीमाले बताइन्।

भेलले केही तलसम्म बगाएपछि झाडी समातेर आफू बाहिर निस्कन सफल भएको उनले बताइन्।

‘मैले केही देखेको थिइनँ। हातमा एउटा झारीजस्तो आयो। त्यही झार समातेर बाहिर निस्किएँ,’ उनले भनिन्।

एक बालिकाको शव फेला

मकवानपुर प्रहरीले बाढीले बगाएकी ८ वर्षीया रोशनी स्याङ्ताङको शव फेला पारेको जनाएको छ। हेटौंडा–१९ बस्तिपुरका दिप स्याङ्ताङकी छोरी रोशनीको शव बगाएको स्थानबाट करिब ५ सय मिटर तल रुखको जरामा अड्किएको अवस्थामा फेला परेको हो।

घटना लगत्तै स्थानीय बासिन्दा र प्रहरीले खोजी थालेका थिए। खोजीका क्रममा रोशनीको शव फेला परेको प्रहरीले जनाएको छ।

दुई बालिका अझै बेपत्ता

घटनामा हेटौंडा–१९ बस्तिपुरका टीकाराम भोलनकी ११ वर्षीया छोरी सुमित्रा भोलन र राजकुमार भोलनकी १२ वर्षीया छोरी बिनिता भोलन अझै बेपत्ता छन्।

खोलामा पानीको बहाव र अँध्यारोका कारण मंगलबार राति खोजी कार्य प्रभावकारी रूपमा अघि बढाउन कठिनाइ भएको प्रहरीले जनाएको छ। बेपत्ता बालिकाको खोजी बुधबार बिहान ६ बजेपछि पुनः सुरु गरिने बताइएको छ।

विद्यालयबाट घर फर्कँदै गर्दा दुर्घटना

चारै जना बालिका एउटै गाउँका रहेको र विद्यालयबाट घर फर्कने क्रममा खोला तर्न खोज्दा बाढीमा परेको बताइएको छ। सामान्य अवस्थामा तर्न सकिने खोलामा अचानक पानीको बहाव बढेपछि उनीहरू जोखिममा परेका हुन्।

घटनापछि स्थानीयवासीमा समेत त्रास फैलिएको छ। प्रहरी, स्थानीयवासी तथा उद्धार टोलीले बेपत्ता बालिकाको खोजीलाई प्राथमिकतामा राखेका छन्।

प्रहरीले खोलाको बहाव तीव्र रहेको अवस्थामा जोखिम मोलेर खोला नतर्न तथा बालबालिकालाई विशेष सावधानी अपनाउन आग्रह गरेको छ।

Originally published on abcnews.com.np.