काठमाडौँ । अस्ट्रेलियाका पूर्वक्रिकेटर डेभिड वार्नरलाई मादक पदार्थ सेवन गरी गाडी चलाएको स्वीकार गरेपछि १ हजार ५०० अस्ट्रेलियन डलर जरिबाना गरिएको छ ।

अदालतले वार्नरको गाडीमा ‘इन्टरलक डिभाइस’ जडान गर्नसमेत आदेश दिएको छ । उक्त उपकरणले चालकको शरीरमा मदिराको मात्रा परीक्षण गर्नेछ । मदिराको मात्रा पाइएमा गाडी स्टार्ट नहुने व्यवस्था हुन्छ ।

गत अप्रिलमा सिड्नीको पूर्वी क्षेत्रमा प्रहरीले वार्नरलाई रोकेर मदिरा परीक्षण गरेको थियो । प्रारम्भिक परीक्षणमा नतिजा पोजिटिभ आएपछि उनलाई मारौब्रा प्रहरी चौकी लगिएको थियो । त्यहाँ गरिएको दोस्रो परीक्षणमा उनको रगतमा मदिराको मात्रा ०.१०४ पाइएको थियो, जुन कानुनी सीमाभन्दा दोब्बरभन्दा बढी हो ।

घटना सार्वजनिक भएपछि विश्वभरका सञ्चारमाध्यममा चर्चा भएको थियो । वार्नरका वकिलले घटनाका कारण उनले सार्वजनिक रूपमा ठूलो क्षति व्यहोर्नुपरेको भन्दै थप सजाय नदिन अदालतसमक्ष आग्रह गरेका थिए ।

अदालतको आदेशपछि वार्नरले गाडी चलाउनुअघि आफ्नो कारमा ‘इन्टरलक डिभाइस’ जडान गर्नुपर्नेछ ।

Originally published on abcnews.com.np.