काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेले आफ्नै पार्टीका सांसदहरूलाई संसद् र सार्वजनिक अभिव्यक्तिमा संयमित तथा मर्यादित हुन निर्देशन दिएका छन्। संसदीय दलको अनौपचारिक बैठकमा उनले पार्टी सरकारमा रहेका बेला सांसदहरूले जिम्मेवार ढंगले भूमिका निर्वाह गर्नुपर्नेमा जोड दिएका हुन्।

बैठकमा लामिछानेले दुई सांसद—आशिका तामाङ र खगेन्द्र सुनार—को नामै लिएर उनीहरूको पछिल्लो गतिविधिप्रति असन्तुष्टि जनाउँदै सचेत गराएको स्रोतले जनाएको छ।

संसद् बैठकमा आक्रोश व्यक्त गर्दै बैठक छाडेर हिँडेकी आशिकालाई लक्षित गर्दै लामिछानेले अभियन्ता र सांसदको भूमिका फरक हुने स्मरण गराएका थिए।

उनले भनेका थिए, ‘जनतालाई सरकार खोज्नभन्दा आशिका तामाङ खोज्न सजिलो छ। तर त्यसो भनेर हामीले विधि–विधान बिर्सिनु हुँदैन। हिजो अभियन्ता हुँदा जस्तो तौरतरिका थियो, सांसदको भूमिका त्योभन्दा फरक हुन्छ।’

‘मैले भनेकै हुनुपर्छ भन्ने सोच राख्नु हुँदैन’

आशिका तामाङले आफ्नो निर्वाचन क्षेत्रका एक युवाको कम्बोडियामा मृत्यु भएपछि शव नेपाल ल्याउन सरकारले सहयोग नगरेको विषयमा संसद्मा आक्रोश व्यक्त गरेकी थिइन्।

सोही प्रसंगमा लामिछानेले कानुनी प्रक्रिया र राज्यको सीमाभित्र रहेर विषय उठाउनुपर्ने बताएका थिए। अवैधानिक रूपमा विदेश पुगेका व्यक्तिको शव सरकारले ल्याउने सम्बन्धमा स्पष्ट कानुनी व्यवस्था नरहेको र कानुन निर्माण तथा कार्यान्वयनका लागि समय लाग्ने उनको भनाइ थियो।

लामिछानेले सांसदलाई आफूले उठाएको विषय वा माग तत्कालै पूरा हुनैपर्छ भन्ने मानसिकता नराख्न पनि सुझाव दिएका थिए।

‘हामीले संसदीय पद्धतिभित्र रहेर मर्यादापूर्वक कुरा राख्नुपर्छ। मैले नै भनेको हुनुपर्छ भन्ने सोच राख्नु हुँदैन,’ उनले भनेको स्रोतको दाबी छ।

बैठकमा भने आशिकाले सभापति लामिछानेको टिप्पणीबारे कुनै प्रतिवाद वा प्रतिक्रिया नदिएको बताइएको छ।

खगेन्द्रलाई रविको सन्देश : ‘फेरि पनि चुनाव आउँछ’

बैठकमा सांसद खगेन्द्र सुनारले प्रहरी महानिरीक्षकमाथि सार्वजनिक रूपमा लगाएको आरोप र टिप्पणीको विषय पनि उठेको थियो।

लामिछानेले सुनारलाई आफ्नो अभिव्यक्ति र भूमिकाप्रति सचेत हुन सुझाव दिँदै जनताले राजनीतिकर्मी र जनप्रतिनिधिको गतिविधि निरन्तर हेरिरहेको स्मरण गराएका थिए।

उनले भनेका थिए, ‘कति बोल्ने र कति नबोल्ने, तपाईँ आफैँ विद्वान हुनुहुन्छ। जनताले सबै कुरा हेरिरहेका हुन्छन्, मूल्याङ्कन गरिरहेका हुन्छन्। फेरि अर्कोपटक पनि चुनाव आउँछ भन्ने विचार गर्नुहोला।’

आफ्नै सरकार, आफ्नै सांसदप्रति ‘संयम’को आग्रह

रास्वपाको आफ्नै नेतृत्वमा सरकार रहेकाले पार्टीका सांसदहरूले सरकारका कमजोरी औँल्याउँदा पनि संसदीय मर्यादा र जिम्मेवारीलाई ध्यान दिनुपर्ने लामिछानेको जोड रहेको स्रोतले जनाएको छ।

बैठकमा लामिछानेको सन्देश मूलतः स्पष्ट थियो—सांसदको भूमिका केवल सडकको विरोध वा दबाबको शैलीमा सीमित हुन सक्दैन। जनप्रतिनिधिले कानुन, संसदीय प्रक्रिया र राजनीतिक जिम्मेवारीभित्र रहेर आफ्ना असहमति र जनताका मुद्दा उठाउनुपर्छ।

यससँगै पार्टीभित्र सरकारका कामकारबाहीमाथि खुलेर प्रश्न उठाउने सांसद र पार्टी नेतृत्वबीचको सम्बन्ध तथा सन्तुलनको विषय पनि पुनः चर्चामा आएको छ।

Originally published on abcnews.com.np.