डोल्पा । जिल्ला प्रशासन कार्यालय डोल्पा र शे–फोक्सुण्डो गाउँपालिकाको संयुक्त आयोजनामा नेपाल–चीन सीमा क्षेत्रका करिब २०० जना स्थानीय बासिन्दालाई प्रस्थान तथा प्रवेशपत्र वितरण गरिएको छ।

सीमावर्ती क्षेत्रका नागरिकलाई दैनिक आवतजावत, व्यापार व्यवसाय तथा सामाजिक गतिविधिका लागि सीमापार जान सहज बनाउने उद्देश्यले गाउँमै पुगेर प्रवेश तथा प्रस्थानपत्र वितरण गरिएको हो।

जिल्ला प्रशासन कार्यालयको समन्वयमा गाउँपालिकाले स्थानीयवासीको विवरण संकलन गरी करिब २०० जनालाई उक्त पत्र उपलब्ध गराएको जनाएको छ।

भौगोलिक कठिनाइ र लामो दूरीका कारण जिल्ला सदरमुकाम पुगेर प्रशासनिक सेवा लिनुपर्ने बाध्यता रहेका स्थानीयलाई गाउँमै सेवा उपलब्ध भएपछि सहज भएको बताइएको छ।

डोल्पाको उत्तरी क्षेत्रका सीमावर्ती बस्तीका नागरिक दैनिक उपभोग्य सामग्री खरिद, व्यापार व्यवसाय तथा आफन्तसँगको भेटघाटका लागि सीमावर्ती क्षेत्रमा आवतजावत गर्दै आएका छन्। प्रवेश तथा प्रस्थानपत्र वितरणले उनीहरूको सीमापार आवतजावतलाई कानुनी र प्रशासनिक रूपमा व्यवस्थित बनाउन सहयोग पुग्ने अपेक्षा गरिएको छ।

शे–फोक्सुण्डो गाउँपालिकाले सीमा क्षेत्रका नागरिकलाई आवश्यक प्रशासनिक सेवा सहज रूपमा उपलब्ध गराउन जिल्ला प्रशासन कार्यालयसँगको समन्वय र सहकार्यलाई निरन्तरता दिने जनाएको छ।

कार्यक्रममा स्थानीय जनप्रतिनिधि, प्रशासनका कर्मचारी तथा सीमावर्ती क्षेत्रका स्थानीयवासीको सहभागिता रहेको थियो।

Originally published on abcnews.com.np.