सार्वजनिक लेखा समितिको बैठकमा बोल्दै ओलीले एनजिओ तथा आइएनजिओका परियोजनामा आउने रकम, खर्च र उपलब्धिको स्पष्ट विवरण सार्वजनिक तथा सरकारी निकायको पहुँचमा हुनुपर्ने बताइन्।

उनले एनजिओ तथा आइएनजिओका गतिविधि र वित्तीय प्रतिवेदनको प्रभावकारी अनुगमन गर्नुपर्नेमा जोड दिँदै वास्तविक रूपमा कति रकम नेपाल भित्रियो र कति खर्च भयो भन्ने विवरण स्पष्ट हुनुपर्ने बताइन्।

ठूला दातृ निकायसँग नेपालले गर्ने वार्ताको रणनीतिमा समेत सुधार आवश्यक रहेको उनको भनाइ थियो। परियोजनाका लागि स्वीकृत रकम, वास्तविक निकासा र खर्चको विवरण सम्बन्धित दातृ निकायले सरकारलाई पूर्ण रूपमा उपलब्ध गराउँछन् कि गराउँदैनन् भन्ने विषयमा समेत उनले प्रश्न उठाइन्।

ओलीले वैदेशिक सहायतामार्फत केही गैरसरकारी संस्थाले नास्तिकता र धर्मान्तरणसम्बन्धी गतिविधि सञ्चालन गरिरहेको आरोपसमेत लगाइन्।

‘नेपालमा आइएनजिओको नामबाट आउने बजेट नास्तिकता र धर्मान्तरणका लागि अधिकतम प्रयोग गरेको पाइएको छ,’ उनले भनिन्, ‘मैले एउटा मात्रै धर्मको कुरा गरिरहेको छैन, विभिन्न धर्मका संघसंस्थामा त्यस्ता बजेट आउने र धर्मान्तरण, नास्तिकता फैलाउनेजस्ता गतिविधि भएको हामीले देखिरहेका छौँ।’

विभिन्न धार्मिक संघसंस्थाले गाउँ–गाउँमा धर्मान्तरणका लागि मानिस परिचालन गरेको दाबी गर्दै उनले त्यस्ता गतिविधिलाई नियमनको दायरामा ल्याउनुपर्ने बताइन्।

‘अहिले त विदेशी मान्छेहरू नै गाउँ–गाउँमा खटिएको पनि हामीले देखिरहेका छौँ। यो कुरा नियमनमा आउनुपर्छ। यसले देशमा धार्मिक द्वन्द्व पनि उत्पन्न गर्न सक्छ,’ ओलीले भनिन्।

उनले वैदेशिक सहायता र गैरसरकारी संस्थामार्फत सञ्चालन हुने सबै परियोजनाको वित्तीय कारोबार तथा गतिविधिको प्रभावकारी अनुगमन आवश्यक रहेको बताइन्।