हेटौँडा । बागमती प्रदेश सरकार गठनमा नेकपा एमाले र नेपाली कम्युनिस्ट पार्टी (नेकपा)लाई समर्थन गरेको राष्ट्रिय प्रजातन्त्र पार्टी (राप्रपा)ले तीन मन्त्रालय पाउने भएको छ।

सहमति अनुसार राप्रपाबाट राजु विष्ट, गिरबहादुर तामाङ र राजेन्द्र प्रजापति मन्त्री बन्ने भएका छन्। राप्रपा सांसद राजु विष्टका अनुसार आफूले खानेपानी तथा ऊर्जा मन्त्रालयको जिम्मेवारी सम्हाल्नेछन्। गिरबहादुर तामाङलाई सामाजिक विकास र राजेन्द्र प्रजापतिलाई पर्यटन मन्त्रालयको जिम्मेवारी दिने तयारी छ।

सत्ता गठबन्धनमा एमालेले मुख्यमन्त्रीसहित दुई र नेकपाले दुई मन्त्रालय लिने सहमति भएको बताइएको छ। नेकपाले भौतिक पूर्वाधार तथा वन तथा वातावरण मन्त्रालय पाउने सम्भावना रहेको छ भने एमालेले मुख्यमन्त्रीबाहेक अर्थ मन्त्रालय लिने तयारी गरेको बताइएको छ।

राप्रपाभित्रै विवाद

बागमतीमा एमालेका किरण थापालाई मुख्यमन्त्री बनाउन समर्थन गरेपछि राप्रपाभित्र भने विवाद चर्किएको छ।

राप्रपा संसदीय दलका नेता उद्धव थापाले एमालेका किरण थापालाई मुख्यमन्त्री बनाउन समर्थन गर्दै पत्र पठाएका थिए। तर उक्त निर्णय पार्टीको केन्द्रीय निर्णयविपरीत भएको भन्दै राप्रपा अध्यक्ष राजेन्द्र लिङदेनले थापामाथि कारबाही प्रक्रिया अघि बढाएका छन्।

यस विषयमा आवश्यक निर्णय गर्न राप्रपाले अनुशासन समिति र कार्यसम्पादन समितिको बैठकसमेत बोलाएको बताइएको छ।

आजै शपथ

प्रदेश प्रमुखको कार्यालयले बिहीबार अपराह्न ४ बजे मुख्यमन्त्री नियुक्त गर्ने र त्यसपछि ४ः२० बजे शपथ गराउने समयतालिका सार्वजनिक गरिसकेको छ।

मुख्यमन्त्रीको नियुक्तिसँगै गठबन्धनमा सहभागी दलका मन्त्रीहरूको पनि शपथ गराउने तयारी गरिएको छ।

Originally published on abcnews.com.np.