हुम्ला । खार्पुनाथ गाउँपालिका–१ सुनाखाडामा कर्णाली नदीमा पौडी खेल्ने क्रममा दुई बालबालिका नदीले बगाउँदा बेपत्ता भएका छन्।

बिहीबार साँझ नदी किनारमा पौडी खेल्न गएका उनीहरू कर्णाली नदीको तीव्र बहावमा बगेपछि बेपत्ता भएका जिल्ला प्रहरी कार्यालय हुम्लाका प्रहरी नायब उपरीक्षक शंकर खड्काले जानकारी दिनुभयो।

बेपत्ता हुनेमा स्थानीय बृषबहादुर शाहीकी ११ वर्षीया छोरी अनु शाही र रामचन्द्र रावलका १२ वर्षीय छोरा प्रशान्त रावल रहेका छन्। दुवै जना मालिका माध्यमिक विद्यालयमा कक्षा ७ मा अध्ययनरत थिए।

खार्पुनाथ गाउँपालिका–१ का वडाध्यक्ष जयबहादुर शाहीका अनुसार नदी किनारमा खेल्ने क्रममा उनीहरूलाई कर्णाली नदीको बहावले बगाएको हो। बिहीबार कर्णाली प्रदेश स्थापना दिवसका अवसरमा सार्वजनिक बिदा परेकाले उनीहरू सुनाखाडा पुगेका थिए।

घटनालगत्तै स्थानीयवासी र प्रहरीको टोलीले कर्णाली नदी किनार तथा आसपासका क्षेत्रमा खोजी अभियान सञ्चालन गरेको थियो। तर, नदीमा पानीको बहाव तीव्र रहेकाले खोजी कार्यमा कठिनाइ भइरहेको प्रहरीले जनाएको छ।

एकैपटक दुई बालबालिका बेपत्ता भएपछि स्थानीय तल्लोलाली गाउँ शोकमा डुबेको छ। बेपत्ता बालबालिकाको खोजी कार्य शुक्रबार बिहानदेखि पुनः सुरु गरिने प्रहरीले जनाएको छ।

Originally published on abcnews.com.np.