कपिलवस्तु । निलो आकाश, सेता बादलका घेरा र चारैतिरको हरियालीबीच लुम्बिनीको विश्व शान्ति स्तूप मनमोहक देखिएको छ । मौसम खुलेसँगै सेतो गुम्बजसहितको स्तूपले पर्यटक तथा आगन्तुकको ध्यान खिचिरहेको छ ।

लुम्बिनी भ्रमणमा आउने पर्यटकका लागि विश्व शान्ति स्तूप धार्मिक आस्था र प्राकृतिक सौन्दर्यको आकर्षक संगम बनेको छ । सफा मौसममा स्तूप वरपरको हरियाली, खुला आकाश र सेतो गुम्बजको दृश्यले वातावरणलाई थप मनमोहक बनाएको छ । स्तूप परिसरमा पुग्ने पर्यटक तथा फोटो खिच्न आउनेहरूका लागि यो क्षेत्र आकर्षणको केन्द्र बनेको छ ।

विश्वभर ८० भन्दा बढी शान्ति स्तूप निर्माण गरिएको बताइन्छ । स्वर्गीय जापानी बौद्ध गुरु निचिडात्सु फुजीले विश्वका विभिन्न स्थानमा यस्ता स्तूप निर्माण गर्नुभएको थियो । शान्ति स्तूपहरूले विश्वमा शान्तिको सन्देश फैलाउन महत्वपूर्ण भूमिका खेलेका फोटो पत्रकार मनोज पौडेल बताउनुहुन्छ ।

लुम्बिनीमा रहेको विश्व शान्ति स्तूप निर्माण गर्न सात वर्ष लागेको थियो । विश्व शान्ति स्तूप धार्मिक आस्था र शान्तिको प्रतीकका रूपमा परिचित छ । आकर्षक वास्तुकलामा निर्माण गरिएको स्तूपको उचाइ ४१ दशमलव ५ मिटर र गोलाइ २० मिटर रहेको छ । यसको आधार स्तम्भको गोलाइ ५९ मिटरसम्म रहेको बताइएको छ ।

विशाल संरचना निर्माणमा करिब ९ सय मेट्रिक टन सिमेन्ट प्रयोग गरिएको थियो । स्तूपलाई आकर्षक बनाउन करिब २७ हजार वर्गफुट मार्बल प्रयोग गरिएको छ ।

मौसम खुलेका बेला स्तूपको सेतो संरचना, हरियाली र निलो आकाशको संयोजनले यहाँको दृश्य थप मनमोहक बनाउने गरेको छ ।

Originally published on abcnews.com.np.