नेपालगन्ज । लामो समयदेखि स्थगित नेपालगन्ज–पोखरा नियमित हवाई सेवा यही भदौ ३१ गतेदेखि पुनः सञ्चालन हुने भएको छ।

निजी क्षेत्रको वायुसेवा कम्पनी बुद्ध एयरले यात्रुको माग बढेपछि नेपालगन्ज–पोखरा उडान पुनः सञ्चालन गर्न लागेको जनाएको छ। बुद्ध एयर नेपालगन्जका प्रमुख विनीतविक्रम शाहले यात्रुको माग बढेकाले उडान पुनः सञ्चालन गर्ने निर्णय गरिएको जानकारी दिए।

उनका अनुसार नेपालगन्जबाट हुने यो उडानले भारतको उत्तर प्रदेशलाई पोखरासँग सिधा जोड्ने भएकाले धार्मिक पर्यटनका दृष्टिले पनि महत्वपूर्ण छ। भारतबाट आउने धार्मिक पर्यटकको संख्या बढेसँगै पछिल्लो समय उडानको मागसमेत बढेको शाहले बताए।

यसअघि भारतबाट आउने धार्मिक पर्यटकको संख्या घट्नुका साथै इन्धन खर्च बढेपछि गत जेठ ५ गतेदेखि उडान स्थगित गरिएको थियो। अहिले पर्यटकको आवागमन र यात्रुको माग बढेकाले सेवा पुनः सञ्चालन गर्न लागिएको बुद्ध एयरले जनाएको छ।

बुद्ध एयरका अनुसार नेपालगन्ज–पोखरा उडान आइतबार, बुधबार र शुक्रबार सञ्चालन हुनेछ। उडानका लागि बुकिङसमेत खुला गरिएको छ।

उडान पुनः सञ्चालन हुने भएपछि बाँकेका पर्यटन व्यवसायी उत्साहित भएका छन्। स्थानीय पर्यटन व्यवसायीको लामो प्रयासपछि २०७८ साल साउन १७ गतेदेखि नेपालगन्ज–पोखरा सातामा तीन दिन उडान सुरु भएको थियो।

Originally published on abcnews.com.np.