काठमाडौँ । काठमाडौँको प्रमुख पर्यटकीय गन्तव्य ठमेललाई चौबीसै घण्टा सुरक्षित, व्यवस्थित र मर्यादित ढङ्गले सञ्चालन गरिने भएको छ।

ठमेल पर्यटन विकास परिषद्को नवनिर्वाचित टोलीले बिहीबार काठमाडौँका प्रमुख जिल्ला अधिकारी ईश्वरराज पौडेलसँग गरेको भेटमा ठमेललाई चौबीसै घण्टा पारिवारिक, सुरक्षित र मर्यादित पर्यटकीय क्षेत्रका रूपमा सञ्चालन गर्न सहकार्य गर्ने सहमति भएको हो।

परिषद्का महासचिव पशुपति कँडेलका अनुसार ठमेललाई चौबीसै घण्टा सञ्चालन हुने पर्यटकीय गन्तव्यका रूपमा विकास गर्न जिल्ला प्रशासन कार्यालय र परिषद्बीच सहकार्य गर्ने सहमति भएको छ। भेटमा ठमेल क्षेत्रको शान्ति–सुरक्षा, ट्राफिक व्यवस्थापन, सडक बालबालिकाको उचित व्यवस्थापन तथा हकर्स व्यवस्थापनलगायत विषयमा छलफल भएको थियो।

यसअघि ठमेल पर्यटन विकास परिषद्का तत्कालीन अध्यक्ष भविश्वर शर्माको पहलमा २०८१ सालमा तत्कालीन गृहमन्त्री रवि लामिछानेले ठमेललाई चौबीसै घण्टा सञ्चालन गर्ने घोषणा गरेका थिए। तर त्यसलाई प्रभावकारी रूपमा कार्यान्वयन गर्न विभिन्न चुनौती देखिँदै आएका थिए।

भेटमा प्रमुख जिल्ला अधिकारी पौडेलले ठमेललाई थप व्यवस्थित बनाउन आवश्यकताअनुसार सुरक्षा निकाय परिचालन गर्ने र परिषद्सँग प्रभावकारी समन्वय गरेर अघि बढ्ने प्रतिबद्धता जनाएका छन्।

परिषद्का अध्यक्ष राजुमान डङ्गोलले ठमेलको दीर्घकालीन शान्ति, सुरक्षा र पर्यटनमैत्री वातावरण निर्माणका लागि विभिन्न सरकारी तथा गैरसरकारी निकायसँग समन्वय गरेर काम भइरहेको बताए।

परिषद्ले अब ठमेलमा चौबीसै घण्टा पर्यटकलाई सुरक्षित, सहज र मर्यादित सेवा उपलब्ध गराउने वातावरण निर्माण गर्ने लक्ष्य लिएको जनाएको छ।

Originally published on abcnews.com.np.