कैलाली । शिक्षा, विज्ञान तथा प्रविधिमन्त्री सस्मित पोखरेलले तीनै तहका सरकारबीच प्रभावकारी समन्वय र सहकार्यबाट मात्रै शिक्षा क्षेत्रको सुधार सम्भव हुने बताउनुभएको छ।

कैलालीको धनगढीमा आयोजित शिक्षा क्षेत्रका नीति, कार्यक्रम, बजेट तथा कार्यान्वयन प्रक्रियासम्बन्धी प्रदेश र स्थानीय तहका सरोकारवालाको तीनदिने प्रदेशस्तरीय अभिमुखीकरण कार्यक्रममा बोल्दै मन्त्री पोखरेलले शिक्षा सुधारका लागि संघ, प्रदेश र स्थानीय सरकारबीच सहकार्य आवश्यक रहेको बताउनुभयो।

उहाँले शिक्षा ऐन, नीति तथा कानुन निर्माण गर्दा सम्बन्धित सबै सरोकारवालासँग पर्याप्त संवाद गर्नुपर्नेमा जोड दिनुभयो। संवाद र सहकार्यबाट शिक्षा क्षेत्रमा देखिएका समस्या समाधान गर्न सकिने उहाँको भनाइ थियो।

कार्यक्रममा शिक्षा विभागका निर्देशक णप्रसाद न्यौपानेले शिक्षा क्षेत्रसँग सम्बन्धित नीति, कानुन, निर्देशिका, मापदण्ड तथा वार्षिक कार्यक्रम कार्यान्वयनमा प्रदेश, स्थानीय तह र शिक्षा विकास तथा समन्वय एकाइबीच समान बुझाइ कायम गर्ने उद्देश्यले अभिमुखीकरण आयोजना गरिएको जानकारी दिनुभयो।

समन्वय एकाइ कैलालीका प्रमुख जीवन न्यौपानेले आर्थिक वर्ष २०८३/८४ का लागि प्रदेश, शिक्षा विकास तथा समन्वय एकाइ र स्थानीय तहका शिक्षा कार्यक्रमबारे छलफल तथा अभिमुखीकरण गरिने बताउनुभयो।

अभिमुखीकरणमा शिक्षा नीति, कार्यक्रम तथा बजेट, ‘सेक्टर वाइड एप्रोच’ अन्तर्गतका व्यवस्था, कार्यक्रमसँग सम्बन्धित सूचक तथा बजेट निकासालगायत विषयमा जानकारी दिइनेछ।

त्यस्तै, स्थानीय शिक्षा योजनाका आधारमा वार्षिक रणनीतिक कार्यान्वयन योजना, वार्षिक कार्ययोजना तथा बजेट निर्माण गर्ने विषयमा पनि प्रशिक्षण दिइने आयोजकले जनाएको छ।

स्थानीय तहले स्वीकृत शिक्षा योजनालाई वार्षिक कार्यक्रम तथा बजेटसँग कसरी जोड्ने भन्ने विषयमा समेत सहजीकरण गरिनेछ। विद्यालय शिक्षा क्षेत्रको सूचना व्यवस्थापन प्रणालीको प्रयोग तथा त्यसबाट प्राप्त तथ्याङ्कलाई शिक्षा योजना निर्माण र कार्यान्वयनमा कसरी उपयोग गर्ने भन्ने विषयमा पनि छलफल हुनेछ।

कार्यक्रममा सुदूरपश्चिम प्रदेशका नौवटै जिल्लाका शिक्षासँग सम्बन्धित निकायका प्रमुख तथा प्रतिनिधिको सहभागिता रहेको छ। शिक्षा क्षेत्रका विभिन्न मापदण्ड, नीति तथा कार्यक्रमबारे समेत अभिमुखीकरण गरिने जनाइएको छ।

Originally published on abcnews.com.np.