लेखनाथ । प्रधानमन्त्री बालेन्द्र शाह शुक्रबार दिउँसो स्थलमार्ग हुँदै कास्की आइपुगेका छन्। पोखरा हुँदै उनी कास्कीको माछापुच्छ्रे गाउँपालिका–६, अस्तामस्थित अन्नपूर्ण इको भिलेज रिसोर्ट पुगेका हुन्।

कास्कीका सहायक प्रमुख जिल्ला अधिकारी चित्राङ्गत बरालका अनुसार प्रधानमन्त्री शाहको शुक्रबार रातिको बसाइ अन्नपूर्ण इको भिलेजमै हुनेछ।

“उहाँ कास्की आइपुग्नुभएको छ। निजी भ्रमणका क्रममा आउनुभएको हो। आजको बास अस्ताममै हुन्छ,” बरालले जानकारी दिए।

प्रधानमन्त्री शाह अपराह्न २ बजेर ५५ मिनेटमा रिसोर्ट पुगेका थिए। प्रधानमन्त्रीसहितको टोलीका लागि रिसोर्टका सबै कोठा बुक गरिएको बताइएको छ।

हिमशृङ्खलाको काखमा प्रधानमन्त्रीको बास

प्राकृतिक सौन्दर्यका लागि परिचित अन्नपूर्ण इको भिलेज वरपरबाट अन्नपूर्ण, धौलागिरि र मनास्लु लगायतका हिमशृङ्खलासँगै पोखरा महानगरको हेम्जा क्षेत्रसमेत अवलोकन गर्न सकिन्छ।

डाँडाकाँडा, जंगल र स्थानीय गाउँबस्तीले घेरिएको अस्ताम क्षेत्र छोटो पदयात्रा र प्रकृतिसँग समय बिताउन चाहने पर्यटकको रोजाइमा पर्ने गर्छ।

प्रधानमन्त्री शाहको यो भ्रमणलाई प्रशासनले निजी भ्रमण का रूपमा जनाएको छ। उनी शनिबार मुस्ताङतर्फ जाने कार्यक्रम रहेको बताइएको छ।

Originally published on abcnews.com.np.