काठमाडौँ । म्याग्दी र मनाङका प्रमुख सडकखण्डमा गएको पहिरोका कारण यातायात सेवा पूर्णरूपमा अवरुद्ध भएको छ। म्याग्दीको बेनी–जोमसोम र मनाङको चामे–बेँसीसहर सडकमा बिहानै पहिरो खस्दा सवारी आवागमन ठप्प भएको प्रहरीले जनाएको छ।

म्याग्दीको रघुगङ्गा गाउँपालिका–२ बैसरीस्थित बेनी–जोमसोम सडकखण्डमा शनिबार बिहान करिब ५ः३० बजे लेदोसहितको ठूलो पहिरो खसेको हो। सडक माथिबाट आएको पहिरोले सडक पुरिएपछि उक्त मार्ग हुँदै चल्ने सम्पूर्ण सवारीसाधन रोकिएका छन्।

त्यस्तै, मनाङको नासो गाउँपालिका–३ खोत्रोमा बिहान करिब ३ बजे पहिरो खस्दा चामे–बेँसीसहर सडक पनि पूर्णरूपमा अवरुद्ध भएको छ। पहिरोका कारण मनाङ आवतजावत गर्ने यात्रु तथा सवारीसाधन प्रभावित भएका छन्।

सडक खुलाउन प्रयास जारी

अवरुद्ध दुवै सडक खुलाउन सम्बन्धित स्थानीय प्रशासन, प्रहरी तथा अन्य निकायको समन्वयमा पहिरो हटाउने प्रयास भइरहेको छ। तर, निरन्तर वर्षा भइरहेकाले सडक खुलाउने कार्यमा कठिनाइ भइरहेको जनाइएको छ।

प्रहरीले वर्षायाममा पहिरोको जोखिम बढेकाले जोखिमयुक्त सडकखण्डमा यात्रा गर्दा विशेष सावधानी अपनाउन आग्रह गरेको छ। सडकको अवस्था सामान्य भएपछि मात्र सवारी सञ्चालन हुने बताइएको छ।

Originally published on abcnews.com.np.