काठमाडौं । नेपाली कांग्रेसका पूर्वसभापति शेरबहादुर देउवा पक्ष १५औँ महाधिवेशनको प्रक्रिया रोक्न माग गर्दै सर्वोच्च अदालत जाने तयारीमा जुटेको छ।

महाधिवेशन प्रक्रिया रोक्न माग गर्दै सर्वोच्चमा दायर गर्न खोजिएको रिट निवेदन तयारी नपुगेको भन्दै शनिबार फिर्ता लगिएको थियो। कांग्रेस नेता एनपी साउदका अनुसार कानुन व्यवसायीहरूले आवश्यक संशोधनसहित रिट पुनः तयार गरिरहेका छन्। उनका अनुसार सोमबार सर्वोच्च अदालतमा रिट दर्ता गर्ने तयारी भइरहेको छ।

देउवा पक्षले सर्वोच्च अदालतबाट पुनरावलोकनको निस्सा प्राप्त भइसकेको अवस्थामा त्यसको अन्तिम टुंगो नलाग्दासम्म पार्टीको १५औँ महाधिवेशनसम्बन्धी प्रक्रिया अघि बढाउन नहुने तर्क गर्दै आएको छ।

पूर्णबहादुर खड्काको छुट्टै तयारी

देउवा पक्षका नेताहरूले तत्कालीन कार्यवाहक सभापति पूर्णबहादुर खड्का पनि सर्वोच्च जाने तयारीमा रहेको बताएका छन्। तर खड्काले भने आफूले शनिबार सर्वोच्चमा कुनै रिट दर्ताका लागि नलगेको स्पष्ट पारेका छन्।

खड्काले सर्वोच्चमा पुनरावलोकनको प्रक्रिया टुंगो नलागेसम्म महाधिवेशनका सबै प्रक्रिया रोक्न माग गर्ने विषयमा कानुन व्यवसायीसँग गम्भीर छलफल भइरहेको बताएका छन्। उनले चाँडै रिट लिएर सर्वोच्च जाने संकेतसमेत दिएका छन्।

पार्टीभित्र बढ्दो विवाद

राष्ट्रिय भेलापछि खड्का असन्तुष्ट बनेको देउवा पक्षका नेताहरूको भनाइ छ। भेलाले खड्कालाई पन्छाउँदै शशाङ्क कोइरालालाई संयोजकका रूपमा अघि सारेपछि पार्टीभित्रको विवाद थप चर्किएको हो।

यसबीच कांग्रेस उपसभापति विश्वप्रकाश शर्माले भने पार्टीभित्रको विवाद अदालतमा नभई पार्टी कार्यालय सानेपामै बसेर समाधान गर्नुपर्ने बताएका छन्। उनले संवादमार्फत समस्या समाधान गर्न सबै पक्षलाई आग्रह गरेका छन्।

असोजमा महाधिवेशन गर्ने कार्यतालिका

कांग्रेसले असोज १६ देखि १९ गतेसम्म १५औँ महाधिवेशन गर्ने गरी कार्यतालिका सार्वजनिक गरिसकेको छ। तर देउवा पक्षले सर्वोच्च अदालतमा विचाराधीन विषयको अन्तिम टुंगो नलागेसम्म महाधिवेशनसम्बन्धी प्रक्रिया अघि बढाउन नहुने दाबी गर्दै आएको छ।

यसअघि इतर पक्षको भेलाले गगन थापालाई सभापति स्वीकार नगर्ने र देउवाकै नेतृत्वमा महाधिवेशन गर्ने निर्णय गरेपछि कांग्रेसभित्रको आन्तरिक विवाद थप पेचिलो बनेको छ।

Originally published on abcnews.com.np.