काठमाडौं । काठमाडौंको तारकेश्वर नगरपालिका–६, जरंखुस्थित अष्टमान टोलमा घर निर्माणका क्रममा गरिएको जमिन कटानपछि पहिरो खसेको छ। पहिरोका कारण टोलका चार–पाँच घर उच्च जोखिममा परेको स्थानीयवासीले बताएका छन्।

स्थानीयका अनुसार घर निर्माणका लागि डोजर प्रयोग गरी जमिन खनेपछि पहिरोको समस्या देखिएको हो। करिब दुई वर्षदेखि उक्त क्षेत्रमा जमिन खन्ने तथा घर निर्माणको काम भइरहेको भए पनि निर्माण कार्य निकै सुस्त गतिमा अघि बढेको उनीहरूको गुनासो छ।

निर्माणका क्रममा आवश्यक सावधानी नअपनाउँदा पहिरोको जोखिम बढेको स्थानीयवासीको आरोप छ। जमिन कटानपछि सडकसमेत प्रभावित भएकाले आवतजावतमा समस्या भएको उनीहरूले बताएका छन्।

तत्काल जोखिम न्यूनीकरण गर्न माग

अष्टमान टोलका स्थानीयवासीले निर्माण पक्षलाई तत्काल पहिरोबाट खसेको माटो हटाउन, सडक व्यवस्थित गर्न तथा थप पहिरो रोक्न आवश्यक संरचना निर्माण गर्न आग्रह गरेका छन्।

पहिरोको जोखिम तत्काल न्यूनीकरण नगरिए वर्षाका समयमा थप क्षति हुन सक्ने भन्दै स्थानीयवासी चिन्तित छन्। उनीहरूले सम्बन्धित निकायले समेत स्थलगत निरीक्षण गरी जोखिम न्यूनीकरणका लागि आवश्यक कदम चाल्न माग गरेका छन्।

Originally published on abcnews.com.np.