बारा । तीन वर्षीया गरिमा चौधरीको बलात्कारपछि हत्या भएको घटनाको विरोधमा चार दिनदेखि अवरुद्ध वीरगन्ज–पथलैया औद्योगिक करिडोर सडकखण्ड आइतबारदेखि सञ्चालनमा आएको छ। पीडित परिवार र सरकारबीच नयाँ सहमति भएपछि आन्दोलनरत पक्षले सडक अवरोध हटाएको हो।

नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, पथलैयाका प्रमुख प्रहरी उपरीक्षक ज्ञानेन्द्रबहादुर बस्नेतले आइतबारदेखि सडकखण्ड सञ्चालनमा आएको जानकारी दिए। सडक खुलेसँगै वीरगन्ज–पथलैया क्षेत्रमा रोकिएका सवारीसाधन पुनः सञ्चालनमा आएका छन्।

यसअघि गरिमा हत्या प्रकरणमा सरकार र पीडित परिवारबीच भएको सहमति परिवारले अस्वीकार गरेपछि सडक अवरोध कायमै थियो।

शनिबार साँझ काठमाडौं पुगेका पीडित बालिकाका आमाबुबाले गृहमन्त्रीसँग भेटवार्ता गरेपछि सरकारसँग पुनः सहमति भएको हो। बाराका सहायक प्रमुख जिल्ला अधिकारी छविरमण भट्टराईका अनुसार गृह मन्त्रालयमा भएको छलफलपछि नयाँ सहमति जुटेको थियो।

सात सदस्यीय समिति गठन हुने

सरकार र पीडित परिवारबीच भएको सहमतिअनुसार जघन्य आपराधिक घटनामा विद्यमान कानुनी व्यवस्था, कसुर र सजायसम्बन्धी प्रावधान पुनरावलोकन गरी आवश्यक कानुनी सुधारका लागि सुझावसहितको प्रतिवेदन तयार गर्न सात सदस्यीय ‘गरिमा न्याय संकल्प समिति’ गठन गरिनेछ।

समितिले सात दिनभित्र प्रतिवेदन पेस गर्ने गरी प्रक्रिया अघि बढाउने सहमति भएको छ।

त्यस्तै, गरिमा चौधरीको स्मृतिमा सालिक निर्माणका लागि सहरी विकास मन्त्रालयले स्थानीय तहसँग समन्वय गरी आवश्यक पहल गर्ने सहमति भएको छ।

गरिमाको अन्त्येष्टि पीडित परिवारको रीतिरिवाज र संस्कारअनुसार गरिने पनि सहमतिमा उल्लेख छ।

आन्दोलनले यातायात र उद्योग प्रभावित

गरिमा हत्या घटनापछि दोषीलाई कडा कारबाही गर्नुपर्ने, पीडितलाई न्याय दिनुपर्ने तथा जघन्य अपराधमा कडा कानुनी व्यवस्था गर्नुपर्ने माग राख्दै स्थानीयवासी र पीडित परिवार आन्दोलनमा उत्रिएका थिए।

आन्दोलनका क्रममा वीरगन्ज–पथलैया औद्योगिक करिडोर सडक अवरुद्ध भएपछि यस क्षेत्रमा यातायातका साथै औद्योगिक गतिविधिसमेत प्रभावित भएका थिए। सडकमा सवारीसाधनको लामो लाइन लाग्नुका साथै उद्योगबाट हुने ढुवानीसमेत प्रभावित भएको थियो।

चार दिनपछि सडक खुले पनि अब घटनाको निष्पक्ष अनुसन्धान, दोषीमाथि कारबाही र सरकार तथा पीडित परिवारबीच भएको नयाँ सहमति कार्यान्वयन मुख्य चासोको विषय बनेको छ।

Originally published on abcnews.com.np.