टोकियो । जापानको पूर्वी क्षेत्रमा आइतबार बिहान ५.९ म्याग्निच्युडको भूकम्प गएको छ । भूकम्पमा परी टोकियोसहित पाँच प्रिफेक्चरमा कम्तीमा ३७ जना घाइते भएका छन् । अधिकारीहरूले भने सुनामीको खतरा नरहेको बताएका छन् ।

जापानको मौसम विज्ञान एजेन्सीका अनुसार भूकम्पको केन्द्रबिन्दु दक्षिणी इबाराकी प्रान्तमा जमिनको सतहबाट करिब ७० किलोमिटर गहिराइमा थियो । अमेरिकी भूगर्भ सर्वेक्षण (यूएसजीएस)ले भने भूकम्पको तीव्रता ५.८ म्याग्निच्युड रहेको जनाएको छ ।

प्रिफेक्चरल अधिकारी तथा अग्नि एवं विपद् व्यवस्थापन निकायका अनुसार टोकियोमा १५, साइतामामा नौ, कानागावामा आठ, चिबामा चार र इबाराकीमा एक जना घाइते भएका छन् ।

अधिकांश घाइते भूकम्पका क्रममा लड्दा वा फर्निचर तथा ढोकामा ठोक्किँदा घाइते भएको जनाइएको छ । कानागावा प्रान्तको योकोहामामा ८० वर्षीया एक महिला ओछ्यानबाट लडेर गम्भीर घाइते भएको स्थानीय सञ्चारमाध्यमले जनाएका छन् ।

भूकम्पपछि टोकियो र नारिता विमानस्थल जोड्ने एक्सप्रेस रेल तथा उत्तरपूर्वी क्षेत्रमा सञ्चालन हुने केही स्थानीय रेल सेवामा ढिलाइ भएको थियो । यद्यपि, सिन्कानसेन बुलेट रेल सेवा सामान्य रूपमा सञ्चालन भएको पूर्वी जापान रेलवे कम्पनीले जनाएको छ ।

प्रधानमन्त्री साने ताकाइचीले सम्भावित क्षतिको मूल्यांकन गर्न सरकारले कार्यदल गठन गरेको जानकारी दिएका छन् ।

जापानको मौसम विज्ञान एजेन्सीले प्रभावित क्षेत्रका बासिन्दालाई आगामी एक सातासम्म थप मध्यम खालका भूकम्प आउन सक्ने भन्दै सतर्क रहन आग्रह गरेको छ ।

टोकियोको कोटो वार्डमा भूमिगत पानीको पाइप फुटेर सडकमा पानी बगेको थियो । चुहावटको मर्मत गरी पानी चुहिने क्रम रोकिएको जनाइएको छ ।

यसैबीच, आणविक नियमन प्राधिकरणले देशका आणविक ऊर्जा केन्द्र तथा अन्य आणविक सामग्रीसम्बन्धी सुविधामा कुनै असामान्य अवस्था नदेखिएको जनाएको छ ।

Originally published on abcnews.com.np.