काठमाडौं । नेपाली कांग्रेसका युवा नेता नैनसिंह महरले पार्टीभित्रको विवाद समाधान गरी एकता कायम गर्न पूर्वसभापति शेरबहादुर देउवासमक्ष तीनवटा प्रस्ताव राखेका छन् ।

आइतबार बिहान उपचारपछि स्वदेश फर्किएका देउवालाई भेटेर महरले पार्टीलाई एकताबद्ध बनाएर अघि बढ्नुपर्ने भन्दै तीनवटा विकल्प प्रस्तुत गरेका हुन् ।

महरका तीन प्रस्ताव

महरले पहिलो विकल्पका रूपमा सभापति गगन थापा र पूर्वसभापति देउवाबीच तत्काल छलफल गरी पार्टीभित्रको विवाद समाधान गर्नुपर्ने सुझाव दिएका छन् ।

दोस्रो विकल्पमा थापा र देउवा दुवैले नेतृत्वको दाबी छाडेर तेस्रो व्यक्तिलाई नेतृत्व सुम्पने र त्यसपछि १५औँ महाधिवेशन निष्पक्ष रूपमा सम्पन्न गर्ने प्रस्ताव उनले राखेका छन् ।

त्यस्तै, तेस्रो विकल्पका रूपमा पार्टीको आधिकारिकतासम्बन्धी विषयमा सर्वोच्च अदालतबाट आउने अन्तिम फैसला स्वीकार गरेर अघि बढ्ने सहमति गर्नुपर्ने सुझाव महरले दिएका छन् । उनका अनुसार अदालतको अन्तिम फैसला आउनुअघि नै सबै पक्षबीच छलफल र सहमति कायम गर्ने प्रयास गर्नुपर्छ ।

देउवासँगको भेट

महरले उपचारपछि स्वदेश फर्किएका देउवालाई पार्टीभित्रको विवाद समाधान र एकताका विषयमा छलफल गर्न भेटेका हुन् ।

देउवा गत साउन २८ गते स्वदेश फर्किएपछि पार्टीका नेता तथा कार्यकर्तासँग भेटघाटमा व्यस्त छन् । पार्टीभित्रको विवाद समाधानका लागि विभिन्न पक्षसँग संवाद भइरहेको बताइएको छ ।

महरले कांग्रेसलाई विभाजनबाट जोगाउँदै एकताबद्ध रूपमा अघि बढाउन नेतृत्व तहबीच सहमति आवश्यक रहेको बताएका छन् ।

Originally published on abcnews.com.np.