काठमाडौं । नेपालको पर्यटन प्रवर्द्धन तथा पर्यटन क्षेत्रका साझा समस्या समाधानका लागि नेपाल एसोसिएसन अफ टुर एण्ड ट्राभल एजेन्ट्स (नाट्टा) र टुरिष्ट बस एसोसिएसन अफ नेपाल (टिवान) बीच सहकार्य हुने भएको छ।

टिवानले आयोजना गरेको नाट्टाको नवनिर्वाचित कार्यसमितिलाई बधाई तथा शुभकामना कार्यक्रममा नाट्टाका नवनिर्वाचित अध्यक्ष भरतजङ्ग पाण्डेले पर्यटन क्षेत्रको विकास र साझा समस्या समाधानका लागि सहकार्य गर्ने प्रतिबद्धता व्यक्त गरे।

टिवान नाट्टाको अभिन्न अङ्ग भएकाले दुवै संस्थाका समस्या साझा रहेको उनले बताए।

‘टिवान छुट्टै संस्था नभई हाम्रो आफ्नै परिवार हो। पर्यटन क्षेत्रका हरेक एजेन्डामा हामी एक भएर अगाडि बढ्नेछौँ,’ पाण्डेले भने।

टिवानका संस्थापक अध्यक्ष श्रीकान्त आचार्यले पर्यटक बस तथा समग्र पर्यटन उद्योगमा विभिन्न समस्या रहेको भन्दै ती समस्या समाधानका लागि वर्तमान कार्यसमितिले पहल गर्ने विश्वास व्यक्त गरे।

पर्यटक बसपार्कको समस्या समाधानमा सहकार्य

नाट्टाका महासचिव राजकुमार देवकोटाले पर्यटक बसपार्कको समस्या टिवानको मात्र नभई समग्र पर्यटन क्षेत्रकै समस्या भएको बताए। यसको समाधानका लागि नाट्टा प्रतिबद्ध भएर अघि बढ्ने उनको भनाइ थियो।

टिवानका अध्यक्ष भीष्मप्रसाद न्यौपानेले पर्यटक बसपार्क नहुँदा व्यवसायीले ठूलो समस्या भोग्नुपरेको बताए। बसपार्कको समस्या समाधानका लागि नाट्टासँग सहकार्य गर्ने उनले प्रतिबद्धता जनाए।

पर्यटक बस व्यवसायीको हकहित तथा अधिकार संरक्षणका लागि स्थापना भएको टिवानले हाल अस्थायी बसपार्कका रूपमा सोह्रखुट्टे सडक प्रयोग गर्दै आएको छ।

दैनिक १०० पर्यटकीय बस सञ्चालन

टिवानका महासचिव प्रकाशचन्द्र अधिकारीका अनुसार संस्थाअन्तर्गत हाल दैनिक करिब १०० पर्यटकीय बस सञ्चालन भइरहेका छन्।

ती बसमार्फत पोखरा, चितवनको सौराहा, लुम्बिनी, जनकपुरलगायत प्रमुख पर्यटकीय गन्तव्यमा सेवा प्रदान हुँदै आएको उनले जानकारी दिए।

कार्यक्रममा नाट्टा र टिवानका पदाधिकारीले पर्यटन क्षेत्रको विकास, व्यवसायीका समस्या समाधान तथा पर्यटन प्रवर्द्धनका लागि आपसी सहकार्यलाई निरन्तरता दिने प्रतिबद्धता व्यक्त गरेका थिए।

Originally published on abcnews.com.np.