काठमाडौं । प्रमुख प्रतिपक्षी दल नेपाली कांग्रेसका सभापति गगन थापाले लाल आयोगको प्रतिवेदन तत्काल सार्वजनिक गर्न सरकारसँग आग्रह गरेका छन्।

सभापति थापाले सोमबार बिहान सामाजिक सञ्जालमार्फत २०७३ सालमा गठन भएको उच्चस्तरीय जाँचबुझ आयोग (लाल आयोग) ले बुझाएको प्रतिवेदन हालसम्म सार्वजनिक नहुँदा घटनाको सत्यतथ्य पूर्ण रूपमा बाहिर आउन नसकेको बताएका हुन्। प्रतिवेदन सार्वजनिक नहुँदा पीडितहरू न्याय पाउनबाट वञ्चित भएको उनको भनाइ छ।

थापाले विगतदेखि नै राजनीतिक दलहरूले सरकारमा जानुअघि प्रतिवेदन सार्वजनिक गर्ने प्रतिबद्धता जनाउँदै आए पनि सरकारमा पुगेपछि कार्यान्वयन गर्न नसकेको उल्लेख गरेका छन्।

उनले अब विगतको कमजोरीलाई प्रतिवेदन सार्वजनिक नगर्ने कारण बनाउन नहुने भन्दै यसपटक प्रतिबद्धता व्यवहारमै कार्यान्वयन गर्नुपर्ने बताएका छन्।

थापाले प्रधानमन्त्री तथा मन्त्रिपरिषद्को कार्यालयलाई सम्बोधन गर्दै भनेका छन्, ‘अब थप विलम्ब नगरी लाल आयोगको प्रतिवेदन सार्वजनिक गरिदिनुहोस्।’

उनले नागरिकलाई सत्य जान्ने र पीडितलाई न्याय पाउने अधिकार रहेको उल्लेख गर्दै प्रतिवेदन सार्वजनिक गर्नुपर्नेमा जोड दिएका छन्।

सभापति थापाका अनुसार २०७४ सालदेखि लगभग हरेक वर्ष लाल आयोगको प्रतिवेदन सार्वजनिक गर्नुपर्ने आवाज उठ्दै आएको छ। तर दशक बित्न लाग्दा पनि प्रतिवेदन सार्वजनिक हुन सकेको छैन।

उनले विगतका सरकारबाट काम हुन नसकेको भए पनि त्यसलाई अहिले प्रतिवेदन सार्वजनिक नगर्ने कारण बनाउन नहुने बताएका छन्।

Originally published on abcnews.com.np.