भक्तपुर । संघीय सांसद प्रमिला कुलुजुले भक्तपुरका विभिन्न क्षेत्रमा देखिएका सडक, सडक मापदण्ड तथा ढल निकासका दीर्घकालीन समस्या समाधानका लागि सरोकारवालासँग छलफल गर्दै स्थलगत निरीक्षण गर्नुभएको छ।

आइतबार भएको निरीक्षणका क्रममा भक्तपुर सल्लाघारी–नगरकोट सडकखण्डअन्तर्गत ठूलो ब्यासीदेखि कमलविनायक मूलढोकासम्मको सडक मापदण्ड तथा स्तरोन्नति, कमलविनायक लान्चा फल्चादेखि खरिपाटी ब्यारेकसम्मको ढल निकास तथा सडक सुधार र पाइपलाइन सिलख क्षेत्रका राजाकुलो, बाटो तथा ढल निकाससम्बन्धी समस्याबारे छलफल गरिएको हो।

छलफलमा पूर्वाधार विकास मन्त्रीका निजी सचिव राजेन्द्र बम, खानेपानी तथा ढल व्यवस्थापन विभागका उपमहानिर्देशक रत्नप्रसाद लामिछानेसहित सम्बन्धित निकायका प्रतिनिधि सहभागी थिए।

सडकको अवस्थाप्रति स्थानीयको गुनासो

स्थलगत निरीक्षणका क्रममा स्थानीयवासीले सडकको दुरवस्थाका कारण दैनिक आवतजावतदेखि आपत्कालीन स्वास्थ्य सेवासम्म प्रभावित भएको गुनासो गरेका छन्।

स्थानीयका अनुसार सडक खराब हुँदा एम्बुलेन्ससमेत समयमा बिरामीसम्म पुग्न कठिन हुने गरेको छ। वर्षायाममा समस्या झनै जटिल हुने भन्दै उनीहरूले सडक स्तरोन्नति र ढल निकासको दीर्घकालीन समाधान गर्न माग गरेका छन्।

सडकको अवस्थाका कारण बालबालिकालाई विद्यालय पठाउँदा समेत वर्षा भए सुरक्षित रूपमा घर फर्कने हो कि होइन भन्ने चिन्ता हुने गरेको स्थानीयवासीले बताएका छन्। सामान्य दैनिक कामका लागि समेत मौसम हेरेर घरबाट निस्कनुपर्ने अवस्था रहेको उनीहरूको भनाइ छ।

बजेट कार्यान्वयनमा प्रश्न

स्थानीयवासीले सडक निर्माण तथा स्तरोन्नतिका लागि पटक–पटक सम्बन्धित निकायको ध्यानाकर्षण गराए पनि अपेक्षित काम हुन नसकेको बताएका छन्।

विगतमा सडक विकासका लागि बजेट विनियोजन भए पनि प्रभावकारी रूपमा कार्यान्वयन हुन नसक्दा बजेट फिर्ता जाने गरेको भन्दै उनीहरूले असन्तुष्टि व्यक्त गरेका छन्।

ढल निकासको दीर्घकालीन समाधान माग

स्थानीयवासीले सडकसँगै ढल निकासको उचित व्यवस्थापन गर्न माग गरेका छन्। वर्षायाममा पानी जम्ने तथा सडकमा आवतजावतमा समस्या हुने भएकाले सडक स्तरोन्नतिसँगै व्यवस्थित ढल निकासको योजना बनाउनुपर्ने उनीहरूको भनाइ छ।

सांसद कुलुजुको स्थलगत निरीक्षणपछि सम्बन्धित निकायबीच समन्वय गरी सडक, ढल तथा राजाकुलोसहितका समस्या दीर्घकालीन रूपमा समाधान गर्ने पहल अघि बढ्ने अपेक्षा गरिएको छ।

Originally published on abcnews.com.np.