काठमाडौं । नेपाली कांग्रेसको १५औँ महाधिवेशन रोक्न माग गर्दै पार्टीका पूर्वसभापति शेरबहादुर देउवा र पूर्वकार्यवाहक सभापति पूर्णबहादुर खड्का सर्वोच्च अदालत पुगेका छन्।

सोमबार (भदौ ८) देउवा र खड्काले भिन्नाभिन्नै रिट निवेदनमार्फत महाधिवेशन प्रक्रिया रोक्न माग गर्दै सर्वोच्च अदालतमा निवेदन दिएका हुन्।

वारेसमार्फत छुट्टाछुट्टै रूपमा पेस भएका दुवै रिटमाथि हाल अध्ययन भइरहेको सर्वोच्च अदालतका प्रवक्ता अर्जुन कोइरालाले जानकारी दिए। रिट दर्ता गर्ने वा नगर्ने विषयमा अध्ययनपछि निर्णय हुने उनले बताए।

“रिट पेस भएको छ। दर्ता हुने वा नहुने विषयमा अध्ययन भएपछि निर्णय हुन्छ,” प्रवक्ता कोइरालाले बताएका छन्।

यसअघि यही विषयमा देउवाले गएको शुक्रबार (भदौ ५) सर्वोच्च अदालतमा रिट निवेदन दिएका थिए। तर, कार्यालय समय सकिन लाग्दा निवेदनमा केही ‘करेक्सन’ गर्नुपर्ने भन्दै उक्त रिट फिर्ता लगिएको थियो।

नेपाली कांग्रेसको विशेष महाधिवेशन २०८२ पुसमा सम्पन्न भएको थियो। उक्त विशेष महाधिवेशनलाई निर्वाचन आयोगले वैधता दिएको थियो भने सर्वोच्च अदालतको संयुक्त इजलासले समेत त्यसलाई सदर गरेको थियो।

तर, देउवा समूहकै निवेदनका आधारमा सर्वोच्च अदालतले यसअघिको फैसलामाथि पुनरवलोकन प्रक्रिया अघि बढाएको छ। यही परिस्थितिलाई आधार बनाउँदै देउवा र खड्काले पुनरवलोकनसम्बन्धी प्रक्रिया टुंगो नलागेसम्म १५औँ महाधिवेशनको प्रक्रिया रोक्नुपर्ने माग गरेका छन्।

Originally published on abcnews.com.np.