काठमाडौँ । बागमती प्रदेशका मुख्यमन्त्री किरण थापाले सोमबार प्रदेश सभाबाट विश्वासको मत लिने तयारी गरिरहेका बेला राष्ट्रिय प्रजातन्त्र पार्टी (राप्रपा) भित्रको विवाद थप चर्किएको छ। मुख्यमन्त्रीलाई विश्वासको मत दिने वा नदिने भन्ने विषयमा एउटै पार्टीबाट दुई फरक ह्विप जारी भएपछि राप्रपाका प्रदेशसभा सदस्य अन्योलमा परेका छन्।

बागमती प्रदेश संसदीय दलका नेता उद्धव थापाले आफू निकट डम्बर तामाङलाई प्रमुख सचेतक नियुक्त गर्दै मुख्यमन्त्री किरण थापाको पक्षमा मतदान गर्न सांसदहरूलाई निर्देशन दिएका छन्।

तर, राप्रपा केन्द्रको निर्देशनअनुसार प्रमुख सचेतक कुमारी तामाङले यसअघि नै मुख्यमन्त्री थापाले मागेको विश्वासको मतको विपक्षमा मतदान गर्न ह्विप जारी गरेकी छन्।

यसरी एउटै दलका सांसदलाई विश्वासको मतको पक्ष र विपक्षमा मतदान गर्न छुट्टाछुट्टै निर्देशन जारी भएपछि बागमती प्रदेश राप्रपाभित्रको शक्ति संघर्ष खुला रूपमा सतहमा आएको छ।

कारबाहीको विवादले झन् चर्कियो टकराव

सोमबार प्रदेशसभा बैठक सुरु हुनुअघि बसेको कार्यव्यवस्था परामर्श समितिको बैठकमा राप्रपाकी प्रमुख सचेतक कुमारी तामाङले संसदीय दलका नेता उद्धव थापामाथि कारबाही नभएसम्म प्रदेशसभा बैठक सञ्चालन हुन नदिने चेतावनीसमेत दिएकी थिइन्।

पार्टीको केन्द्रीय निर्णय र निर्देशनविपरीत प्रदेश सरकारलाई समर्थन गरेको आरोपमा राप्रपाले उद्धव थापामाथि कारबाही प्रक्रिया अघि बढाएको छ। बागमती प्रदेश सरकार गठनका क्रममा पार्टीको केन्द्रीय नीतिविपरीत सरकारलाई समर्थन गरेको भन्दै केन्द्रले थापामाथि कारबाहीको प्रक्रिया थालेको हो।

राप्रपा केन्द्रले प्रदेश सरकारमा सहभागी नहुने नीति लिएको अवस्थामा उद्धव थापाले प्रदेश सरकारलाई समर्थन गरेका थिए। त्यसयता पार्टी केन्द्र र बागमती प्रदेश संसदीय दलबीच अधिकार तथा राजनीतिक निर्णयको विषयमा विवाद बढ्दै आएको छ।

केन्द्रबाट कारबाहीको प्रक्रिया अघि बढाइए पनि उद्धव थापाले आफू अझै संसदीय दलको नेता रहेको दाबी गर्दै आएका छन्। यही हैसियतमा उनले नयाँ प्रमुख सचेतक नियुक्त गरी मुख्यमन्त्रीको पक्षमा मतदान गर्न निर्देशन दिएका हुन्।

यता, कुमारी तामाङले भने पार्टीको आधिकारिक केन्द्रीय निर्णयअनुसार मुख्यमन्त्रीले मागेको विश्वासको मतको विपक्षमा मतदान गर्न सांसदहरूलाई ह्विप जारी गरेकी छन्।

विश्वासको मतमा राप्रपा निर्णायक?

एउटै दलबाट जारी भएका दुई विपरीत ह्विपमध्ये राप्रपाका सांसदहरूले कुन निर्देशन पालना गर्छन् भन्ने विषय अहिले बागमतीको राजनीतिको मुख्य चासो बनेको छ।

मुख्यमन्त्री किरण थापाले सोमबार प्रदेश सभामा विश्वासको मत लिँदै छन्। सरकारलाई बहुमत जुटाउन आवश्यक मतको समीकरणमा राप्रपाका सांसदको भूमिका निर्णायक बन्न सक्ने अवस्थामा पार्टीभित्रको यो विवादले विश्वासको मतको परिणामलाई समेत प्रभावित पार्न सक्ने देखिएको छ।

सत्ता राजनीतिमा रोचक मोड

विश्वासको मत लिनुअघि राप्रपाभित्र देखिएको ‘ह्विपको जुहारी’ ले बागमती प्रदेशको सत्ता राजनीतिलाई थप रोचक र अनिश्चित बनाएको छ। अब एउटै पार्टीका सांसदहरू मुख्यमन्त्रीको पक्षमा उभिन्छन् वा पार्टी केन्द्रको निर्णयअनुसार विपक्षमा मतदान गर्छन् भन्ने प्रश्नको जवाफ प्रदेशसभा बैठकले दिनेछ।

Originally published on abcnews.com.np.