हेटौँडा । बागमती प्रदेशसभाको सोमबार दिउँसो १ बजेका लागि तय गरिएको बैठक अन्तिम समयमा साँझ ५ बजेका लागि सारिएको छ। मुख्यमन्त्री किरण थापा मगरले विश्वासको मत लिने तयारी गरिरहेका बेला दलहरूबीच सहमति नजुटेपछि बैठकको समय परिवर्तन गरिएको हो।

प्रदेशसभा सचिवालयले विशेष कारणवश निर्धारित समयमा बैठक बस्न नसक्ने जनाएको छ। प्रदेशसभा नियमावली, २०७४ को नियम ६ को उपनियम (३) बमोजिम सभामुखले बैठक आजै साँझ ५ बजे बस्ने गरी नयाँ समय निर्धारण गरेका हुन्।

मुख्यमन्त्री थापा मगरले सोमबारकै प्रदेशसभा बैठकबाट विश्वासको मत लिने कार्यसूची बनाएका थिए। तर, विश्वासको मतसँगै समसामयिक राजनीतिक विषयमा दलहरूबीच मतभेद देखिएपछि निर्धारित समयमा बैठक बस्न नसकेको बताइएको छ।

राप्रपाको विवाद र सांसद कारबाहीको विषय पेचिलो

प्रदेश सरकारलाई समर्थन गर्ने सांसदहरूको अवस्था, राष्ट्रिय प्रजातन्त्र पार्टी (राप्रपा) भित्रको आन्तरिक विवाद तथा सांसदहरूमाथि भएको कारबाहीको विषयलाई लिएर प्रदेश राजनीतिमा विवाद चर्किएको छ।

मुख्यमन्त्री नियुक्तिका क्रममा राप्रपाका केही प्रदेशसभा सदस्यको समर्थनलाई लिएर प्रश्न उठिरहेको छ। पार्टी केन्द्रको निर्णयविपरीत सरकार गठनमा समर्थन गरेको विषय तथा त्यसपछि भएका कारबाहीले सरकारको बहुमत र विश्वासको मत प्रक्रियालाई थप जटिल बनाएको छ।

सोमबार बिहानदेखि नै दलहरूबीच सहमति जुटाउने प्रयास भइरहेको बताइएको छ। प्रदेशसभा सचिव रामकुमार पौडेलले जारी गरेको सूचनामा भने बैठक सारिनुको कारण केवल ‘विशेष कारण’ उल्लेख गरिएको छ।

अब बागमती प्रदेशसभाको बैठक साँझ ५ बजे बस्नेछ। उक्त बैठकमा मुख्यमन्त्री थापा मगरले विश्वासको मत लिने वा राजनीतिक सहमतिको प्रयासले नयाँ मोड लिने भन्ने विषयलाई चासोका साथ हेरिएको छ।

Originally published on abcnews.com.np.