काठमाडौं । श्रम संस्कृति पार्टीकी सांसद अम्बिकादेवी संग्रौलाले सरकारको चालु आर्थिक वर्षको बजेटको असफलता पहिलो महिनामै देखिन थालेको टिप्पणी गरेकी छन् ।

प्रतिनिधिसभाको सोमबारको बैठकमा बोल्दै सांसद संग्रौलाले बैंकिङ प्रणालीमा पर्याप्त तरलता भए पनि व्यवसायीहरू ऋण लिएर लगानी गर्न इच्छुक नदेखिनु सरकारको आर्थिक नीतिप्रति अविश्वासको संकेत भएको बताइन् ।

उनले अर्थमन्त्री डा. स्वर्णिम वाग्लेले ३६ देश चिनेको दाबी गरिए पनि आफ्नै देशको अर्थतन्त्र बुझ्न नसकेको आरोप लगाइन् । सरकार गठन भएयता पुँजीबजारमा ६ खर्ब रुपैयाँ डुबेको उनको दाबी छ ।

‘अर्थमन्त्रीज्यूले ३६ देशलाई चिनेको भनेर सत्तापक्षका माननीयज्यूहरू भन्नुहुन्छ । तर, उहाँले ३६ देशलाई चिनेर आफ्नै देशलाई चिन्न सक्नुभएन,’ उनले भनिन् ।

सांसद संग्रौलाले अर्थमन्त्रीले ल्याएको बजेटको कमजोरी चालु आर्थिक वर्षको पहिलो महिना सकिँदासम्ममै देखिएको दाबी गरिन् ।

बैंकिङ प्रणालीमा ठूलो मात्रामा तरलता रहे पनि व्यवसायीले ऋण लिएर लगानी गर्न नचाहनुको कारण सरकारको आर्थिक नीतिमाथि अविश्वास त होइन भन्ने प्रश्नसमेत उनले गरिन् ।

‘बैंकिङ प्रणालीमा यति धेरै तरलता हुँदा पनि किन कोही लगानी गर्न ऋण लिन चाहिरहेको छैन ? के व्यवसायीहरूलाई दुईतिहाइ बहुमतको सरकारको अर्थनीतिमा अविश्वास भएकै हो त ?’ उनले प्रश्न गरिन् ।

सरकार गठन भएपछि पुँजीबजारमा ६ खर्ब रुपैयाँ डुबेको दाबी गर्दै उनले अर्थतन्त्रमा समस्या देखिँदा पनि अर्थमन्त्री समाधान खोज्नभन्दा चिठ्ठा खेलाउनेतर्फ केन्द्रित भएको आरोप लगाइन् ।

‘यत्रो समस्या हुँदा पनि अर्थमन्त्रीज्यू चाहिँ चिठ्ठा खेलाउनमा व्यस्त हुनुहुन्छ । अर्थतन्त्रको समस्या समाधान नगरी देश विकास हुन्छ र ?’ उनले प्रश्न गरिन् ।

सांसद संग्रौलाले अर्थतन्त्रका विद्यमान समस्या समाधान गर्न सरकारले तत्काल प्रभावकारी कदम चाल्नुपर्ने बताइन् ।

Originally published on abcnews.com.np.