बारा । सिमरामा तीन वर्षीया बालिकाको बलात्कारपछि हत्या भएको घटनाका आरोपित नाबालकको सोधपुछ गरिएको भिडिओ सामाजिक सञ्जालमा सार्वजनिक भएपछि प्रहरीले अनुसन्धान थालेको छ ।

घटनामा संलग्न रहेको आरोपमा पक्राउ परेका नाबालकलाई अस्पतालमा लैजाँदा प्रहरीबाहेकका व्यक्तिले सोधपुछ गर्दै भिडिओ खिचेको र उक्त भिडिओ सामाजिक सञ्जालमा सार्वजनिक भएको प्रहरीको प्रारम्भिक जानकारी छ ।

अनुसन्धानकै क्रममा रहेका नाबालकले घटनामा आफ्नो संलग्नता स्वीकार गर्दै घटना कसरी घटाएको भन्नेबारे बयान दिएको भिडिओमा देखिन्छ । तर, अनुसन्धानका क्रममा रहेका बालबालिकाको सोधपुछको भिडिओ सार्वजनिक भएको विषयलाई प्रहरीले गम्भीर रूपमा लिएको जनाएको छ ।

प्रहरी प्रधान कार्यालयले भिडिओ कसले खिच्यो र कसरी सार्वजनिक भयो भन्ने पत्ता लगाई संलग्नलाई कानुनी कारबाहीको दायरामा ल्याउन मधेश प्रदेश प्रहरी कार्यालयलाई निर्देशन दिएको छ ।

केन्द्रीय प्रहरी कार्यालयको निर्देशनपछि घटनाबारे अनुसन्धान गर्न मधेश प्रदेश प्रहरी कार्यालयका प्रवक्ता एसएसपी प्रभु ढकाल सोमबार बारा पुगेका छन् । भिडिओ सार्वजनिक भएको विषयमा प्राविधिक तथा स्थलगत रूपमा अनुसन्धान भइरहेको उनले बताए ।

‘यो विषयलाई हामीले गम्भीर रूपमा लिएका छौँ । यही विषयको अनुसन्धानका लागि म पनि बारा पुगेको छु । यसमा को–को संलग्न छन्, प्रहरीबाट के–कस्ता कमजोरी भए भन्ने सबै विषयमा अनुसन्धान गरेर दोषीलाई कानुनबमोजिम कारबाही हुन्छ,’ एसएसपी ढकालले भने ।

सिमरा उपमहानगरपालिका–१ की तीन वर्षीया बालिका गत साउन ३१ गतेदेखि हराएकी थिइन् । तीन दिनपछि सोही क्षेत्रको एक घरमा उनको शव फेला परेको थियो ।

प्रहरीको प्रारम्भिक अनुसन्धानबाट बालिकाको बलात्कारपछि हत्या भएको निष्कर्ष निकालिएको छ । घटनामा संलग्न रहेको आरोपमा प्रहरीले नाबालकसहित केही व्यक्तिलाई पक्राउ गरी अनुसन्धान गरिरहेको जनाएको छ ।

यसैबीच, अनुसन्धानका क्रममा रहेका नाबालकको सोधपुछको भिडिओ सार्वजनिक हुनु घटनाको अनुसन्धान तथा बालबालिकाको अधिकारसँग सम्बन्धित गम्भीर विषय भएकाले प्रहरीले भिडिओ सार्वजनिक गर्ने व्यक्तिको पहिचान र प्रहरीको सम्भावित कमजोरीसमेत अनुसन्धानको दायरामा राखेको जनाएको छ ।

Originally published on abcnews.com.np.