काठमाडौं । राष्ट्रिय स्वतन्त्र पार्टी (रास्वपा) का सांसद मनिष झाले जनकपुरमा गुठीको अतिक्रमित जग्गा खाली गराउँदा सबैमाथि समान व्यवहार गर्न सरकारको ध्यानाकर्षण गराएका छन् ।

प्रतिनिधिसभाको सोमबारको बैठकमा बोल्दै सांसद झाले अतिक्रमण हटाउने क्रममा गरिब तथा निमुखाको आवासमा मात्रै डोजर चलाउन नहुने भन्दै सबै वर्ग र समुदायमाथि समान व्यवहार गर्न सरकारसँग आग्रह गरेका हुन् ।

जनकपुरमा गुठीको अतिक्रमित जग्गा पत्ता लगाउन २०६२ सालमा भोजराज घिमिरेको नेतृत्वमा गठित कार्यदलले दिएको प्रतिवेदनलाई आधार बनाएर अतिक्रमण हटाउने काम भइरहेको उनले बताए ।

जनकपुरमा करिब ९५० बिघा गुठी जग्गा अतिक्रमण भएको उल्लेख गर्दै झाले उक्त जग्गा संरक्षण तथा फिर्ता गर्ने अभियानमा सरकार गम्भीर र सजग हुनुपर्ने बताए ।

‘यो डोजर प्रहार गरिबहरूमाथि मात्र नहोस् । सबैमाथि समान व्यवहार गरियोस् र जनकपुरको ९५० बिघा अतिक्रमण गरिएको जमिन संरक्षण गर्ने र फर्काउने अभियानमा सरकार सफल र सजग होस् भन्ने सन्तुलित अनुरोध छ,’ उनले भने ।

यसैबीच, गुठी संस्थान जनकपुरधामले शनिबारदेखि गिरनारी कुट्टी नजिक रहेको गोरधोइ पोखरीको अतिक्रमित डिल खाली गराउन थालेको छ ।

पोखरीको डिलमा भएको अतिक्रमण हटाउने क्रममा सम्बन्धित सबै पक्षमाथि समान व्यवहार हुनुपर्ने सांसद झाले बताएका छन् । उनले सार्वजनिक तथा गुठी सम्पत्तिको संरक्षणका लागि सरकारको कदम प्रभावकारी र निष्पक्ष हुनुपर्नेमा जोड दिएका छन् ।

Originally published on abcnews.com.np.