काठमाडौं । नेकपा एमाले संसदीय दलकी उपनेता पद्मा अर्यालले प्रचण्ड बहुमत, युवा नेतृत्वको उपस्थिति र संसद्मा प्रभावकारी अवरोध नभएको अवस्थामा पनि सरकारले अपेक्षित गतिमा काम गर्न नसकेको भन्दै प्रश्न उठाएकी छन्।

सोमबार बसेको प्रतिनिधिसभा बैठकमा बोल्दै अर्यालले सरकारसँग काम गर्ने पर्याप्त अनुकूल वातावरण रहेकाले अब ढिलासुस्तीको कुनै कारण नहुने बताइन्।

“प्रचण्ड बहुमत छ । मन्त्रीमा युवाहरूको जमात छ । सदनमा प्रतिपक्षको विरोध छैन । तर, सरकारलाई फटाफट, सरासर काम गर्न के ले छेकेको छ ?” उनले प्रश्न गरिन्।

अर्यालले आफू सरकार असफल होस् भन्ने पक्षमा नरहेको स्पष्ट पार्दै सरकार सफल भएको देख्न चाहेको बताइन्। सरकारले आफ्ना नीति, योजना र कार्यक्रमलाई प्रभावकारी ढंगले कार्यान्वयन गर्दै परिणाममुखी काम गर्नुपर्नेमा उनले जोड दिइन्।

उनले सरकारले जनताले अनुभूति गर्ने गरी काम गर्नुपर्ने बताउँदै संसद्मा पटक–पटक उही विषय उठाउनुपर्ने अवस्था अन्त्य होस् भन्ने अपेक्षा व्यक्त गरिन्।

“सरकार सफल भएको देख्न चाहन्छौँ,” उनले भनिन्, “आफ्ना योजना र कार्यक्रमलाई सही ढंगले अगाडि बढाएर काम गरियोस्, ताकि हामीले सधैँ यही कुरा दोहोर्‍याएर उठाउन नपरोस्।”

Originally published on abcnews.com.np.