काठमाडौं । टप एन्ड टी–२० सिरिजमा नेपाल ‘ए’ले होबर्ट हुरिक्यान्स एकेडेमीलाई ३९ रनले हराउँदै पहिलो जित दर्ता गरेको छ । सोमबार डार्विनस्थित मरारा क्रिकेट मैदानमा भएको खेलमा नेपालले होबर्टलाई पराजित गर्‍यो ।

नेपालले प्रस्तुत गरेको १५५ रनको लक्ष्य पछ्याउने क्रममा होबर्ट हुरिक्यान्स एकेडेमी १८.३ ओभरमा ११५ रनमै सीमित भयो । होबर्टका लागि नितेश स्यामुएलले ३७, टिम वार्डले २३, कप्तान निवेथन राधाकृष्णनले २० र जेक कर्टियनले १२ रन बनाए । नेपालका नारायण जोशीले तीन विकेट लिए भने पवन सराफ र साहब आलमले दुई–दुई तथा विपिन खत्रीले एक विकेट झारे ।

यसअघि टस हारेर ब्याटिङको निम्तो पाएको नेपालले निर्धारित २० ओभरमा आठ विकेट गुमाएर १५४ रन बनाएको थियो । नेपालका कुशल भुर्तेलले ३९, मयन यादवले ३१, कप्तान अनिलकुमार साहले २८, लोकश बमले अविजित २० र तृतराज दासले १० रन योगदान गरे । होबर्टका राफ म्याकमिलनले तीन, मार्कस बीनले दुई तथा निवेथन राधाकृष्णन र ब्राडली होपले एक–एक विकेट लिए । पहिलो जितसँगै नेपालले दुई अंक प्राप्त गरेको छ ।

यसअघिका नतिजाहरू

नेपाल यसअघि आयोजक नर्दन टेरिटोरी स्ट्राइकसँग आठ विकेट र बंगलादेश हाई–परफर्मेन्स टिमसँग ९ विकेटको हार व्यहोरेको थियो । यता, होबर्ट हुरिक्यान्स एकेडेमीले पनि लगातार तेस्रो हार बेहोरेको छ । टोली यसअघि भिक्टोरिया क्रिकेट संघ–११ सँग पाँच विकेट र बंगलादेश हाई–परफर्मेन्स टिमसँग तीन विकेटले पराजित भएको थियो ।

आगामी खेल

अब नेपालले बुधबार अस्ट्रेलियन क्यापिटल टेरिटोरीको सामना गर्नेछ ।

Originally published on abcnews.com.np.