हेटौँडा । सत्तारूढ दलहरूबीचको विवाद समाधान हुन नसक्दा बागमती प्रदेश सभाको बैठक फेरि सारिएको छ। साँझ ५ बजेका लागि तय गरिएको बैठक राति ८ बजेका लागि सारिएको हो।

यसअघि दिउँसो १ बजे बस्ने भनिएको प्रदेश सभा बैठक पनि दलहरूबीच सहमति जुट्न नसकेपछि साँझ ५ बजेका लागि सारिएको थियो। तर, सत्तारूढ गठबन्धनभित्र सरकारको भागबण्डा, मन्त्री छनोट र शक्ति बाँडफाँटको विषयमा विवाद कायम रहेपछि बैठक दोस्रो पटक पनि सार्नुपरेको हो।

सत्तारूढ नेकपाभित्र केही प्रदेश सभा सदस्य मन्त्री नियुक्ति, मन्त्रालय बाँडफाँट तथा सरकार सञ्चालनमा आफ्नो दलको भूमिकालाई लिएर असन्तुष्ट रहेको बताइएको छ। दलभित्र सहमति नजुटेसम्म प्रदेश सभा बैठकमा सहभागी नहुने संकेत उनीहरूले दिएका छन्।

यता राष्ट्रिय प्रजातन्त्र पार्टी (राप्रपा) भित्र पनि संसदीय दलका नेता उद्धव थापाको विषयलाई लिएर विवाद कायमै छ। पार्टी केन्द्रले थापामाथि गरेको कारबाहीलाई लिएर प्रदेश सभामा समेत मतभेद देखिएको छ। राप्रपाले मुख्यमन्त्रीलाई विश्वासको मत नदिन ह्विपसमेत जारी गरिसकेको छ।

प्रमुख प्रतिपक्षी नेपाली कांग्रेसले पनि मुख्यमन्त्री नियुक्तिविरुद्ध परेको रिटको टुंगो नलाग्दै विश्वासको मत लिने प्रक्रिया अघि बढाइए प्रदेश सभा बैठक बहिष्कार गर्ने चेतावनी दिएको छ।

सत्तारूढ दलभित्रको शक्ति बाँडफाँट विवाद, राप्रपाभित्रको आन्तरिक मतभेद र प्रमुख प्रतिपक्षी कांग्रेसको चेतावनीका कारण मुख्यमन्त्री किरण थापा मगरले विश्वासको मत लिने प्रक्रिया थप अन्योलमा परेको छ।

प्रदेश सभा सचिव रामकुमार पौडेलले जारी गरेको सूचना अनुसार प्रदेश सभाको बैठक अब राति ८ बजे बस्ने तय गरिएको छ।

Originally published on abcnews.com.np.