सिन्धुपाल्चोक । असार ३१ गतेदेखि पूर्ण रूपमा ठप्प रहेको तातोपानी नाका जोड्ने सडक सञ्चालनमा ल्याउन सोमबारदेखि पहिरो र भग्नावशेष हटाउन थालिएको छ। इको र लिपिङ क्षेत्रमा पहिरो तथा भासिएको सडक मर्मत गरी केही दिनभित्र नाका सडक सञ्चालनमा ल्याउने तयारी गरिएको हो।

भोटेकोशी गाउँपालिका–२ का वडाध्यक्ष कुमार श्रेष्ठका अनुसार तातोपानी नाकाको इको पहिरो, लिपिङ बजारको पहिरो तथा भूकम्पबाट क्षतिग्रस्त घरटहरा हटाउने काम सुरु भएको छ। यसअघि डाक्लाङको पहिरोसमेत पन्छाइएको थियो।

इको, डाक्लाङको पहिरो तथा लिपिङ क्षेत्रका भग्नावशेष हटाएपछि सडक सञ्चालनमा ल्याउन सहज हुने बताइएको छ।

नेपाल–चीन सीमा जोड्ने मितेरी पुल नजिकको लिपिङ क्षेत्रमा सडक भासिएर साँघुरिएको छ। माथिल्लो भागमा बस्ती र तल भोटेकोशी नदीको बहाव रहेकाले सडकको केही भाग तानिएको छ। त्यसका कारण हाल यातायात सञ्चालन हुन सकेको छैन।

दर्जनौँ मेसिन परिचालन

सडक डिभिजन कार्यालय चरिकोटका प्रमुख नारायणदत्त भण्डारीका अनुसार इको र डाक्लाङको पहिरो पन्छाएपछि अहिले लिपिङ क्षेत्रमा पहिरो तथा भग्नावशेष हटाउने र भासिएको सडक उकास्ने काम सुरु गरिएको छ।

दर्जनौँ मेसिन प्रयोग गरी पहिरो र भग्नावशेष हटाउने काम भइरहेको छ। इको पहिरो क्षेत्रमा सडक मर्मतका लागि सरकारले ४८ करोड ४९ लाख रुपैयाँ बजेट उपलब्ध गराएको थियो।

तर, नेपाली ठेकेदारसँगको ठेक्का गत वैशाखमा तोडेर चिनियाँ कम्पनी चाइना नाइन्टिन्थ मेटलर्जिकल कर्पोरेसनलाई जिम्मा दिइएको थियो। चिनियाँ कम्पनी इको क्षेत्रमा सडक मर्मतका लागि नआएपछि सडक डिभिजन कार्यालय आफैँले पहिरो हटाउने काम गरिरहेको भण्डारीले बताए।

सम्झौताअनुसार उक्त बजेटबाट इको क्षेत्रमा करिब २०० मिटर सडकको पहिरो रोकथाम तथा सडक मर्मत–सुधार गर्नुपर्नेछ। तर, ठेकेदार कम्पनीले हालसम्म काम सुरु नगरेको सडक डिभिजन कार्यालयले जनाएको छ।

८५ कन्टेनर अझै रोकिए

लिपिङ क्षेत्रका भग्नावशेष हटाएर भासिएको सडक मर्मत भएपछि लिपिङपारि रोकिएका करिब ८५ वटा मालसामान बोकेका कन्टेनर तातोपानी नाकातर्फ आउन सक्नेछन्।

लिपिङवारी र इको पहिरोबीच रोकिएका कन्टेनर भने इकोको पहिरो पन्छाइएपछि तातोपानी भन्सारतर्फ पठाउन थालिएको छ।

सिन्धुपाल्चोक उद्योग वाणिज्य संघका अध्यक्ष बुद्धराज बस्नेतले नाका सडक पूर्ण रूपमा सञ्चालनमा आए नजिकिँदो चाडपर्वका सामान तातोपानी नाकाबाट राजधानी भित्र्याउन सहज हुने बताए।

उनले लिपिङमा भासिएको सडक दीर्घकालीन रूपमा मर्मत गर्नुका साथै इको र डाक्लाङका पहिरो नियन्त्रण गरी बाह्रै महिना नाका सञ्चालन हुने व्यवस्था मिलाउन सरकारसँग माग गरेका छन्।

Originally published on abcnews.com.np.