काठमाडौं । प्रतिनिधिसभाको आगामी संसद् क्यालेन्डर तय भएको छ। सभामुख डीपी अर्यालको अध्यक्षतामा मंगलबार बसेको प्रतिनिधिसभाको कार्यव्यवस्था परामर्श समितिको बैठकले आगामी बैठकको कार्यसूची तथा सञ्चालनसम्बन्धी कार्यक्रम स्वीकृत गरेको हो।

बैठकमा प्रतिनिधिसभाको आगामी संसद् क्यालेन्डर, सदनलाई थप प्रभावकारी, व्यवस्थित र परिणाममुखी बनाउने तथा विचाराधीन विषयलाई प्राथमिकताका आधारमा अघि बढाउने विषयमा छलफल भएको सभामुखको सचिवालयले जनाएको छ।

यी दिन बस्नेछ बैठक

समितिको बैठकले भदौ १५, १६, १७, २२, २३ र २४ गते प्रतिनिधिसभा बैठक सञ्चालन गर्ने कार्यतालिका स्वीकृत गरेको छ।

बैठकमा महत्त्वपूर्ण विधेयक तथा समसामयिक विषयलाई प्राथमिकताका साथ अघि बढाउने, संसद्को कामकारबाही नियमित र प्रभावकारी बनाउने तथा सदनको कार्यसम्पादनलाई थप व्यवस्थित गर्ने विषयमा पनि छलफल भएको थियो।

दलका प्रमुख सचेतक सहभागी

कार्यव्यवस्था परामर्श समितिको बैठकमा प्रतिनिधिसभामा प्रतिनिधित्व गर्ने विभिन्न राजनीतिक दलका प्रमुख सचेतक, सचेतक तथा सम्बन्धित पदाधिकारी सहभागी थिए।

समितिले सदनमा विचाराधीन विषयलाई प्राथमिकताका आधारमा अघि बढाउँदै संसदीय कामकारबाहीलाई थप परिणाममुखी बनाउनेमा जोड दिएको छ।

Originally published on abcnews.com.np.