काठमाडौँ । भियतनाममा जारी विश्व सुन्दरी प्रतियोगिता ‘मिस वर्ल्ड २०२६’ मा नेपालका तर्फबाट सहभागी मिस नेपाल लुना लुइँटेल ट्यालेन्ट राउन्डको फाइनलमा पुगेकी छन्।

प्रतियोगिताका विभिन्न प्रारम्भिक चरणअन्तर्गत हेड टु हेड, टप मोडल र स्पोर्ट्स विधामा नेपालले सफलता हात पार्न नसके पनि ट्यालेन्ट राउन्डमा लुनाले उत्कृष्ट प्रदर्शन गर्दै अन्तिम चरणमा स्थान बनाउन सफल भएकी हुन्। उक्त विधाको फाइनलमा नेपालसहित २३ जना प्रतियोगी पुगेका छन्।

ट्यालेन्ट राउन्डमा लुनाले उपाधि जित्न सफल भए नेपाललाई सिधै शीर्ष ४० मा प्रवेश गर्ने अवसर मिल्नेछ। यसले मिस वर्ल्डको अन्तिम प्रतिस्पर्धातर्फ नेपालको यात्रा थप बलियो बनाउन सक्ने अपेक्षा गरिएको छ।

यसैबीच, मिस वर्ल्डको आधिकारिक भोटिङमा पनि लुनाले नेपाली समर्थकबाट उल्लेख्य साथ पाइरहेकी छन्। एसिया तथा ओसियाना क्षेत्रअन्तर्गतको ‘पिपुल्स च्वाइस’ विधामा लुनाले ३० हजार ७०२ मत प्राप्त गर्दै सातौँ स्थानमा रहेकी छन्। यस विधामा हाल कम्बोडियाकी प्रतियोगी शीर्ष स्थानमा छिन्।

ट्यालेन्ट राउन्ड र टप मोडल राउन्डको नतिजा २८ अगस्टमा सार्वजनिक गरिनेछ।

नेपालका लागि यसपटकको अर्को महत्त्वपूर्ण प्रतिस्पर्धा भने ‘ब्युटी विथ अ पर्पस’ विधा रहनेछ। यसअघि पनि नेपालले यस विधामा उल्लेखनीय सफलता हासिल गरिसकेको छ। लुनाले यस वर्ष पर्वत जिल्लाको फलेवासमा शिक्षा, स्वास्थ्य र उद्यमशीलतासँग सम्बन्धित सामाजिक परियोजना प्रस्तुत गरेकी छन्।

करिब डेढ करोड रुपैयाँको लगानीमा तयार गरिएको उक्त परियोजनालाई नेपालको बलियो दाबेदारीका रूपमा हेरिएको छ। परियोजनाले स्थानीय समुदायको शिक्षा, स्वास्थ्य र आर्थिक सशक्तीकरणमा केन्द्रित रहेर काम गर्ने लक्ष्य राखेको बताइएको छ।

नेपालले ट्यालेन्ट राउन्डको उपाधि वा ‘ब्युटी विथ अ पर्पस’ विधामा सफलता हात पार्न सके मिस वर्ल्ड २०२६ मा नेपालको सम्भावना थप बलियो बन्नेछ।

मिस वर्ल्ड २०२६ को ग्रान्ड फिनाले सेप्टेम्बर ५ मा आयोजना हुनेछ।

Originally published on abcnews.com.np.