काठमाडौं । रसुवा जिल्लाको भोटेकोशी नदीमा आएको भीषण बाढी स्थानीय रूपमा भएको भारी वर्षाका कारण नभएको जल तथा मौसम विज्ञान विभागका वरिष्ठ मौसमविद् मीनकुमार अर्यालले स्पष्ट पारेका छन्।
उनका अनुसार बितेको २४ घण्टामा रसुवा जिल्लाका विभिन्न स्थानमा सामान्य वर्षा मात्रै भएको छ। उक्त अवधिमा वर्षाको मात्रा सात मिलिमिटरभन्दा बढी नरहेको प्रारम्भिक विवरणले देखाएको उनले बताए।
यति कम वर्षाका बाबजुद ठूलो विनाश निम्त्याउने गरी बाढी आउनुले यसको कारण सामान्य मौसमी वर्षा नभएको संकेत गरेको मौसमविद् अर्यालको भनाइ छ।
हिमताल वा प्राकृतिक बाँध फुटेको आशंका
बाढीको सम्भावित कारणका रूपमा हिमताल फुटेको वा अन्य कुनै प्राकृतिक अवरोध भत्किँदा एक्कासि ठूलो परिमाणमा पानी बगेको हुन सक्ने आशंका गरिएको छ।
“सबै तहसनहस हुनेगरी कसरी बाढी आयो भन्नेबारे थप अनुसन्धान गरिनेछ,” वरिष्ठ मौसमविद् अर्यालले बताएका छन्।
बाढीको वास्तविक कारण पत्ता लगाउन विस्तृत अध्ययन आवश्यक रहेको जल तथा मौसम विज्ञान विभागले जनाएको छ। सम्भावित हिमताल विस्फोट, हिमपहिरो वा पहिरोका कारण नदी थुनिएर बनेको अस्थायी बाँध फुटेको हुन सक्ने विषयमा समेत अनुसन्धान केन्द्रित हुने बताइएको छ।
हाल प्रभावित क्षेत्रमा भएको क्षतिको विवरण संकलनसँगै बाढीको स्रोत र वास्तविक कारण पहिचान गर्ने प्रयास भइरहेको छ।
Originally published on abcnews.com.np.
प्रतिक्रिया दिनुहोस्