काठमाडौं । चीनतर्फबाट आएको भीषण बाढी भोटेकोशी हुँदै त्रिशूली नदीतर्फ बढ्न थालेपछि सम्भावित जोखिमलाई मध्यनजर गर्दै काठमाडौं उपत्यकाबाट धादिङ, रसुवा र चितवनतर्फ जाने सवारीसाधन रोकिएको छ।

बाढीका कारण सडक तथा नदी आसपासका क्षेत्रमा जोखिम बढ्न सक्ने आकलन गर्दै काठमाडौं उपत्यका ट्राफिक प्रहरी कार्यालयले नागढुंगा र भीमढुंगा नाका हुँदै बाहिरिने सवारीसाधनलाई काठमाडौंमै रोकेको हो।

उपत्यका ट्राफिक प्रहरी कार्यालयका प्रवक्ता प्रहरी उपरीक्षक नरेशराज सुवेदीका अनुसार, बाढीको जोखिम कायमै रहेकाले धादिङ, रसुवा र चितवनतर्फ जान लागेका सवारीसाधनलाई तत्काल यात्रा नगर्न आग्रह गरिएको छ।

उनले भने, “जोखिमका कारण त्यसतर्फ जान लागेका सवारीलाई नजान भनिएको छ।”

ट्राफिक प्रहरीले यातायात व्यवसायीलाई समेत ती जिल्लातर्फ सार्वजनिक सवारीसाधन सञ्चालन नगर्न आग्रह गरेको छ। सम्भावित बाढी, सडक अवरोध तथा नदी तटीय क्षेत्रमा बढ्दो जोखिमलाई ध्यानमा राख्दै यो सावधानी अपनाइएको प्रहरीले जनाएको छ।

नागढुंगा र भीमढुंगा नाकाबाट धादिङ, रसुवा र चितवनतर्फ जान लागेका चारपाङ्ग्रे निजी सवारीसाधन र दुईपाङ्ग्रे सवारीसाधनलाई समेत रोक लगाइएको छ।

ट्राफिक प्रहरीले बाढीको बहाव, नदी तटीय क्षेत्रको जोखिम तथा सडकको अवस्थाको निरन्तर अनुगमन भइरहेको जनाएको छ। अवस्था सामान्य भएपछि मात्रै सवारी आवागमन खुला गर्ने वा थप कडाइ गर्नेबारे निर्णय गरिने बताइएको छ।

Originally published on abcnews.com.np.