रसुवारसुवा जिल्लाको त्रिशूली–३ बी जलविद्युत् आयोजना निर्माणस्थलमा कार्यरत रामप्रसाद पौडेल र अन्य करिब ३०० जना कामदार बिहान पौने १० बजे एक्कासि आएको बाढीले प्रभावित भएका छन्। आयोजनामा काम गरिरहेको अवस्थामा माथिल्लो क्षेत्रबाट आएको आवाज र हावाको वेगले भूकम्प आएजस्तो लागेपछि उनीहरू भाग्न थालेका हुन्।

पौडेलका अनुसार, सुरुङभित्रै काम गरिरहेका कर्मचारीहरूलाई पनि ठूलो झर्कन महसुस भएको थियो। तर, केहीबेरमै त्रिशूली नदीमा भीषण बाढी आएको जानकारी प्राप्त भयो। ‘सुरुङबाट यस्तो हावा आयो कि पातपतिङ्गर सबै उडाएर ल्यायो। भूकम्प आयो भनेर हामी भाग्यौँ। पछि हेर्दा त खोलामा भयंकर बाढी आएको रहेछ’, उनले नेपालखबरसँग टेलिफोनमा बताए।

बाढीको वेग यति उच्च थियो कि आयोजनामा कार्यरत धेरै कर्मचारीहरूलाई भाग्नसमेत समय मिलेन। पौडेलले आफू भाग्यवश आयोजनाबाट केही पर रहेको र डिलजस्तो ठाउँमा भएका कारण सुरक्षित रूपमा भाग्न सफल भएको बताए। ‘आयोजनामा भएकामध्ये २०–३० जना साथीहरुको साथ सम्पर्कमा छुँ, तर बाँकी साथीहरूको अवस्थाबारे थाहा छैन’, उनले चिन्ता व्यक्त गरे।

पहाड चिर्दै आएको बाढीले बाटोमा परेका सबै कुरा बगाएर लग्यो। नदी आसपासका बस्तीहरू पनि निमेषमै खोलामा डुबे। पौडेल अहिले दामपानी भन्ने स्थानमा आश्रय लिएर बसेका छन्।

क्षति र बेपत्ता

पौडेलले आयोजनास्थलको संरचना पूर्ण रूपमा नष्ट भएको बताए। ‘कुनै पनि चिह्न छैन, नदीको दायाँबायाँ केही पनि बाँकी छैन’, उनले टेलिफोनमा नेपालखबरसँग भने। दामपानी पुग्न त्रिशूली नदीबाट हिँडेर करिब ३० मिनेट लाग्छ। उनी सुरक्षित स्थानमा त पुगेका छन्, तर आवश्यक औषधि र अन्य सामग्रीको अभावमा चिन्तामा छन्।

उनका अनुसार, सुरुङभित्र काम गरिरहेका र पावर हाउस आसपासमा रहेका कर्मचारीहरूको अवस्था अज्ञात छ। भूगोलअनुसार क्षति पनि फरकफरक छ। साँघुरो स्थानमा पानीको तह उच्च रहेको र होचो स्थानमा बाढीले बस्ती नै डुबाएको छ। ‘खोलाको दायाँ–बायाँका कुनै बस्ती पनि बाँकी छैनन्। केहीबेरमै सबै कुरा बगाएर लग्यो’, पौडेलले थपे।

आवश्यकता

पौडेल र उनका सहकर्मीहरू अहिले दामपानीमा आश्रय लिएर बसेका छन्। उनीहरूलाई प्रेसरको औषधि, बिजुली र वारपार गर्ने पुलको आवश्यकता छ। ‘हामी यहाँ त बसिरहेका छौँ, तर प्रेसरको औषधि खानुपर्ने छ। त्रिशूली नदीबाट वारिपारि गर्ने अवस्था छैन, न पुल छ, न बिजुली। औषधि ल्याउने उपाय पनि छैन’, पौडेलले बताए।

उनले बाढीले गर्दा आयोजनास्थल र आसपासका क्षेत्रमा व्यापक क्षति भएको जानकारी दिए।

Originally published on abcnews.com.np.