काठमाडौं । रसुवाको भोटेकोसी क्षेत्रमा फेरि बाढी आउन सक्ने सम्भावना रहेको भन्दै राष्ट्रिय विपद् जोखिम न्यूनीकरण तथा व्यवस्थापन प्राधिकरणले स्थानीयवासीलाई उच्च सतर्कता अपनाउन आग्रह गरेको छ ।

प्राधिकरणका अनुसार चिनियाँ पक्षबाट प्राप्त सूचनामा फुटेको हिमतालमा अझै करिब सात मिटर अग्लो पानी थुनिएको भाग जुनसुकै बेला फुट्न सक्ने अवस्था रहेको जानकारी आएको छ ।

उक्त संरचना फुटेमा भोटेकोसी नदीमा पुनः ठूलो बाढी आउन सक्ने र नदी तटीय क्षेत्रमा जोखिम बढ्न सक्ने प्राधिकरणको भनाइ छ । त्यसैले तटीय क्षेत्रमा बसोबास गर्ने नागरिकसँगै राहत तथा उद्धार कार्यमा खटिएका सुरक्षाकर्मी र स्वयंसेवकलाई समेत विशेष सावधानी अपनाउन आग्रह गरिएको छ ।

प्राधिकरणले सम्भावित जोखिमलाई मध्यनजर गर्दै स्थानीय तह, सुरक्षा निकाय तथा सम्बन्धित सरोकारवाला निकायलाई आवश्यक तयारी अवस्थामा रहन निर्देशन दिएको छ ।

चिनियाँ पक्षको चेतावनी

चिनियाँ पक्षबाट प्राप्त जानकारीअनुसार हालै फुटेको हिमतालमा अझै उल्लेख्य मात्रामा पानी जम्मा रहेको छ । त्यसका कारण पानी थुनिएको भाग पुनः फुट्न सक्ने जोखिम कायमै रहेको जनाइएको छ ।

चिनियाँ पक्षको सूचनालाई गम्भीरतापूर्वक लिँदै सम्भावित जोखिमबाट नागरिकलाई जोगाउन आवश्यक सतर्कता अपनाइएको प्राधिकरणले जनाएको छ ।

सम्भावित बाढीको अवस्थामा तत्काल उद्धार गर्न सुरक्षा निकायलाई तयारी अवस्थामा राखिएको छ भने जोखिमयुक्त तटीय क्षेत्रका नागरिकलाई सुरक्षित स्थानमा सार्ने तयारीसमेत गरिएको बताइएको छ ।

Originally published on abcnews.com.np.