काठमाडौं । बुधबार बिहान त्रिशूली नदीमा आएको भीषण बाढीले नुवाकोटको विदुरस्थित त्रिभुवन त्रिशूली माध्यमिक विद्यालय पूर्ण रूपमा क्षतिग्रस्त भएको छ ।

विद्यालयका प्रधानाध्यापक राजेन्द्र दवाडीका अनुसार बाढीले विद्यालयको सम्पूर्ण संरचना बगाउनुका साथै पुरिएको छ । प्ले ग्रुपदेखि कक्षा १२ सम्म पढाइ हुने उक्त विद्यालयमा १ हजार ६ सय ४३ विद्यार्थी अध्ययनरत छन् ।

प्रधानाध्यापक दवाडीका अनुसार बाढीको सूचना पाएपछि प्रार्थनाको समयमा विद्यालयमा रहेका अधिकांश विद्यार्थीलाई तत्काल घरतर्फ पठाइएको थियो । तर उनीहरूमध्ये धेरैको अवस्था अझै यकिन हुन सकेको छैन ।

“सूचना पाएपछि मैले विद्यालयमा देखेका विद्यार्थीलाई बाहिर निकालेँ । विद्यार्थीहरू घर जाने भन्दै निस्किएका थिए । उनीहरूको अवस्था थाहा छैन,” दवाडीले बताए ।

उनका अनुसार हाल ७० जना विद्यार्थी आफूहरूसँगै सुरक्षित अवस्थामा रहेका छन् ।

विद्यार्थीको अवस्थाबारे जानकारी लिने प्रयास

बाढी विद्यालयतर्फ आउन थालेपछि प्रधानाध्यापकसहित विद्यालयका कर्मचारी बाहिरिएका थिए । केही विद्यार्थी घरतर्फ गइसकेका थिए भने कतिपय विद्यार्थी विद्यालय आउँदै गरेको हुन सक्ने वा घरमै रहेको हुन सक्ने भएकाले उनीहरूको अवस्थाबारे तत्काल यकिन हुन नसकेको विद्यालयले जनाएको छ ।

प्रधानाध्यापक दवाडीले विद्यार्थी तथा अभिभावकसँग सम्पर्क गर्ने प्रयास भइरहेको बताए ।

बाढीले विद्यालयको संरचना नै बगाएर पुरिएपछि तत्काल क्षतिको विस्तृत मूल्यांकन गर्नसमेत कठिनाइ भएको छ । विद्यालयमा रहेका शैक्षिक सामग्री, फर्निचर तथा अन्य सम्पत्तिमा समेत ठूलो क्षति पुगेको अनुमान गरिएको छ ।

Originally published on abcnews.com.np.