काठमाडौं । नेपाली कांग्रेसका सभापति गगन थापाले विपद्को कठिन समयमा सरकारलाई पार्टीको पूर्ण साथ रहने बताएका छन्।

केन्द्रीय कार्यसमितिको बैठकपछि पत्रकारहरूसँग कुरा गर्दै सभापति थापाले विपद्को सामना गर्न सबै नागरिक एकढिक्का हुनुपर्नेमा जोड दिए।

“दुःखको बेलामा सरकारको साथमा छौँ,” थापाले भने, “सबै नागरिक एकढिक्का भएर विपद् सामना गर्नुपर्छ। मिथ्या सूचना फैलाउने काम गर्दैनौँ। संकटको बेलामा सरकारको साथमा छौँ।”

उनले प्रभावित क्षेत्रमा स्थानीय सरकारलाई आवश्यक सहयोग गर्न पार्टीका नेता तथा कार्यकर्तालाई आग्रह गर्दै विषम परिस्थितिमा संघ, प्रदेश र स्थानीय सरकारबीच प्रभावकारी सहकार्य आवश्यक रहेको बताए।

मिथ्या सूचना नफैलाउन आग्रह

सभापति थापाले विपद्को समयमा अपुष्ट तथा मिथ्या सूचना फैलाउँदा थप समस्या सिर्जना हुन सक्ने भन्दै जिम्मेवार सूचना प्रवाहमा ध्यान दिन आग्रह गरे।

कांग्रेस केन्द्रीय समितिको बैठकमा पछिल्लो राजनीतिक अवस्था, देशको समग्र परिस्थिति तथा पार्टीका आगामी कार्यक्रमबारे छलफल भएको थियो। बैठकमा सभापति थापाले बाढीबाट उत्पन्न संकट र राहत–उद्धारका विषयमा समेत जानकारी गराएका थिए।

Originally published on abcnews.com.np.